Siglir tar il cuntegn

Header

audio
Senza internet spert patescha l’economia
Or da Actualitad dals 11.12.2020.
laschar ir. Durada: 03:25 minutas.
cuntegn

Schanza per las regiuns Senza internet spert patescha l’economia

Era las regiuns periferas da la Svizra dovran lingias d’internet spert per pudair concurrer cun ils centers.

En cumparegliaziun cun ils vischins posseda la Svizra ina buna infrastructura d'internet. Quai mussan era las rangaziuns che vegnan adina puspè publitgadas. Là tutga la Svizra regularmain tar ils diesch pajais cun las pli spertas lingias d'internet. Mo quai saja la vista generala, di Lorenz Bösch da l'interpresa da cussegliaziun Hanser. Cunzunt ils centers urbans possian profitar dal svilup tecnologic, da fibras da vaider enfin en las singulas abitaziuns. En las regiuns periferas, e tar quellas tutgan era bleras regiuns muntagnardas, n’è la prestaziun betg sin il nivel giavischà. E quai haja consequenzas.

Lorenz Bösch, partenari da Hanser Consulting
Legenda: «La digitalisaziun è ina schanza per las regiuns muntagnardas», di Lorenz Bösch da Hanser Consulting. MAD
Nus essan en ina fasa nua che la digitalisaziun da l’economia s’augmenta e tgi che na po betg esser da l’entschatta da la partida tar quai svilup quel ha in dischavantatg.
Autur: Lorenz BöschFirma Hanser

Era relevant per il turissem

Gist quai aspect han els examinà l'onn passà en il studi ch'els han fatg per mauns dal Secretariat da stadi per l'economia SECO. Sco exempel numna Bösch l’hotellaria. Là na saja betg il manaschi sco tal, pia il biro ni la plattafurma da cudeschar la raschun pertge ch'i dovria internet spert mabain ils giavischs e las spetgas dals osps, di Bösch.

Ils osps spetgan ch’els pon trametter via l’internet da l’hotel fotografias ed auter da lur aventuras. Vis uschia è il turissem era ina da las branschas ch’è dependenta da lingias d’internet spert.

Lavur a distanza sco schanza

In auter aspect haja pervia da la crisa da corona survegnì dapli attenziun ed attractivitad. Abitar en las regiuns muntagnardas, datiers da la natira e cun auta qualitad da viver e lavurar a distanza, en il homeoffice. En Svizra, cun ses grond sectur da servetschs ina pussaivladad che haja senz'auter in grond futur, manegia Bösch.

Quai è per las regiuns muntagnardas era ina schanza. Mo quai pretenda natiralmain che quellas lingias d’internet spert èn era disponiblas per che quai funcziunescha.

Instrument da la promoziun regiunala

I na va pia betg mo per simplamain pudair surfar pli spert ni pudair guardar films en pli auta qualitad. I va per las perspectivas economicas da las regiuns periferas da la Svizra. Il cussegliader beneventa perquai las stentas en il Parlament federal d'augmentar la spertadad minimala da l’internet en Svizra dad oz 10 mbit/s sin 80 mbit/s. Atgnamain duvrassi qua anc dapli, manegia el.

E qua na vesa Lorenz Bösch betg mo la Confederaziun en l'obligaziun d'agir, mabain era las regiuns sezzas. Saja quai cun collavuraziuns, per exempel sche vias vegnan sanadas e ch'ins nizzegia lura gist la chaschun da metter novs bischens per fibras da vaider ni cun sustegns finanzials à fond perdu.

RTR actualitad 07:00

Artitgels legids il pli savens

Scrollar a sanestra Scrollar a dretga