Els n'hajan insumma betg spetgà che la Schlagerparade haja in tal success di Andy Stöckli. Ensemen cun Tom Leibundgut ed Tschämp Patigler aveva el inizià ed organisà la premiera. Ils fundaturs eran da quest temp tuts trais ustiers a Cuira. Per lur osps organisavan els adina puspè sairas tematicas. Uschia per exempel er ina saira da schlagher en la «Toms Beerbox». E quai ch'el haja vis là è strusch stà da crair per Andi Stöckli.
Tut quels che tadlavan uschiglio heavy metal u hip hop faschevan festa e chantavan schlagher.
E suenter ch'el ha vis en la rait il «Schlagermove» a Hamburg saja el ì tar ses collegas cun l'idea dad er far insatge sumegliant. Entaifer tschintg u ses emnas hajan els alura mess en pe la Schlagerparade a Cuira. L'um da 57 onns sa regorda bain da quest mument. Duront la premiera saja il trio dal comité d'organisaziun numnadamain sesì sin il tetg dad in bus da VW vegl. E quai senza segirada u pudair sa tegnair insanua. Cun ina gervosa en il maun ed a chantand cun tutta forza ils schlaghers che las bands sin ils «Hossamobils» sunavan.
Jau ves anc oz avant mai la fatscha dal cumandant da la Polizia da la citad da Cuira cura ch'el ha vis nus sin in tetg dal bus.
Termin fix en l'agenda
Durant l'emprima ediziun saja lura er schon naschida la proxima idea. Perquai ch'in dals mobils saja stà memia grond per ir vinavant haja quel stuì tegnair sin il Martinsplatz. La glieud haja gì plaschair e festivava, lura hajan els gist decidì da far la parada la proxima giada cun concerts ed ina tribuna fixa. Er ils resuns durant e suenter la premiera sajan stads dal tuttafatg positivs. El decurs dals ultims 25 onns sajan alura er stads numerus musicist da schlagher sin tribuna a Cuira. Ils emprims sajan stads il 1998 Cindy&Bert e Bata Ilic. Ed er sche Andy Stöckli è suenter tschintg onns sortì dal comité d'organisaziun saja el quasi mintg'onn da la partida. La Schlagerparade a Cuira saja in termin fix en si'agenda. Natiralmain cun vestgadira originala dals onns da schlagher, quai s'audia semplamain vitiers.