Tenor ils derschaders federals na violescha la contribuziun betg la libertad da cretta da la baselgia catolica u il dretg da la baselgia chantunala. Ordavant aveva gia la dretgira administrativa grischuna decis, ch'i saja legitim che la baselgia catolica sustegnia finanzialmain l'organisaziun. Questa decisiun n'ha l'uvestgieu betg acceptà e tratg vinavant ella a Losanna.
Uvestgieu cumbatta dapi il 2012 encunter Adebar
Il 2012 aveva il vicari general da l'uvestgieu, Martin Grichting, pretendì da stritgar la contribuziun ad «adebar». En il num da l'uvestg Vitus Huonder ha el crititgà che la contribuziun vegnia er duvrada per cussegliaziuns d'abort e quai na saja betg cumpatibel cun la ductrina catolica. Er temas sco las modas da sa proteger per vegnir en speranza na correspundian betg a l'idea da la baselgia.
Uvestgieu: «Daners per activitads encunter la baselgia»
L'uvestgieu da Cuira commentescha la decisiun cun nunchapientscha. La baselgia catolica en Svizra stoppia cunquai acceptar ch'il stadi lubeschia a las organisaziuns (baselgia chantunala) fundadas dad el, d'incassar daners da taglia dals cartents e d'agir cun quests daners encunter principis da la baselgia catolica. Uschia hai num en la communicaziun da l'uvestgieu.
Corpus catholicum ed «adebar» èn cuntents e levgiads
La baselgia chantunala dal Grischun è cuntenta che la chaussa è uss giud maisa. Marcel Furger, il vicepresident dal Corpus catholicum chapescha però che l'uvestgieu na sustegn betg tut quai ch'il post da cussegliaziun fa.
Er il post da cussegliaziun «adebar» è cuntent ch'ins po ussa puspè quintar cun la contribuziun senza stuair ir vid las reservas finanzialas. Dapi il 2012 n'ha l'uniun betg pli survegnì ils 15'000 francs. Daners ch'hajan mancà ils ultims onns, uschia la manadra dad «adebar» Susanne Siegrist.
RR novitads 12:00
