Sch’ins fima, inhaleschan ins ina massa substanzas toxicas. Quellas substanzas san midar la DNA da las cellas e crear mutaziuns. Las cellas mutadas san sa multiplitgar e chaschunar tumors.
Tgi che chala da fimar reducescha la ristga da survegnir cancer dal lom. Fin ussa n’èsi betg dal tuttafatg stà sclerì daco che quai è uschia.
Cellas saunas protegian il lom
Ina gruppa da perscrutaders en la Gronda Britannia ha chattà il motiv pertge che la ristga da survegnir cancer sa reducescha sch’ins chala da fimar. La perscrutaziun mussa ch’il lom donnegià sa revegn grazia ad ina gruppa da cellas saunas en il lom, numnadamain las cellas-tschep. Quellas produceschian cellas saunas e remplazzian las cellas donnegiadas. Sch’ins chala da fimar sa meglierescha la productivitad da questas cellas. Las cellas-tschep sa protegian fitg bain dal fim toxic d’ina cigaretta e na daventan betg mutaziuns. Pertge che quai ès uschia, n’è betg anc sclerì.
Era cun 80 onns sa revegn il lom
Las cellas-tschep èn resistentas e gidan al carstgaun l’entira vita da sa regenerar. Era tar ils candidats pli vegls en la perscrutaziun han ils scienziads observà effects positivs grazia a la regeneraziun da las cellas-tschep.
Sulettamain intercurì sis ex-fimaders
En il studi èn 16 persunas vegnidas intercuridas. Da quai eran sis anteriurs fimaders e trais fimaders. Uschia è il studi ord vista statistica anc sin chommas falombras.
RTR Co e cum 11:15