La Scola auta da pedagogia dal Grischun ha lantschà questa stad ina nova furmaziun supplementara, cun il titel «Bildung im digitalen Wandel». Quella duai scolar las persunas d'instrucziun pertutgant la digitalisaziun ed animar quellas d’integrar tals meds pli savens ed a moda pli multifara en stanza da scola.
«Digitalas immigrantas ed immigrants»
Er per persunas d'instrucziun è il mund digital per part nov, sco il manader da la nova purschida da furmaziun David Halser di. Las medias digitalas vegnan pli e pli preschentas en scola e bleras persunas d’instrucziun sa sentan savens malsegiras u memia pauc cumpetentas da laschar integrar quellas activamain en l’instrucziun. Tras la nova purschida da furmaziun supplementara duain questas malsegirezzas vegnir evitadas.
La purschida
La scolaziun dura in onn a temp parzial e porscha quatter differents accents d'approfundaziun, uschenumnads profils. Quests profils furman la basa da la scolaziun. Sper tut quai porscha la scol'auta er moduls facultativs per quels che vulan s'approfundar anc dapli en ils temas. «La finamira è d'abilitar las participantas ed ils participants, da svegliar l'interess e da dar vinavant ad els il plaschair vi dal emprender digital», di David Halser
L'emprender cun e tras meds digitals en scola è ozendi dapli che mo in'opziun, perquai ch'er il plan d'instrucziun 21 pretenda da s'occupar da quels. Cunquai ch'il mund sa sviluppeschia adina dapli en direcziun digitalisaziun saja tenor David Halser fitg impurtant, da preparar ils uffants per quest futur e da dar sin via ad els las cumpetenzas necessarias.
La digitalisaziun pussibilitescha novas furmas da convivenza. En spezial influenzescha ella era il process d’emprender en scola.
Cun la nova purschida duain las persunas d'instrucziun daventar pli segiras ed il know-how duai gidar ellas d'integrar cuntegns digitals a moda pli creativa ed interactiva en l'instrucziun. Sa participar al nov program pon tut las scolastas e tut ils scolasts. Quai vala per persunas cun experientscha sco era per talas cun pli pauca experientscha, che vulan daventar pli cumpetentas sin quest champ.
