La situaziun en las scolas autas dal Grischun
Ina brev a tut quels che han terminà il gimnasi - quai è ina da las strategias da la scola aulta da pedagogia dal Grischun per chattar glieud interessada. E quai er anc onns suenter la fin da la matura. Tenor il rectur da la scola Reto Givel è quai d'ina vart per chattar persunas d'instrucziun spezialisadas per il stgalim secundar, da l'autra vart vul la PH render attent a quellas persunas che han fatg la matura professiunala.
Ina mancanza avain nus mo en singuls secturs: nus avain per exempel memia paucas persunas d'instrucziun per pedagogia curativa da scola.
Er tar la magistraglia rumantscha e taliana dettia ina mancanza en il Grischun. L'onn passà han cumenzà 13 persunas rumantschas e 26 persunas talianas il studi a la PH – en cumparaziun cun passa 100 persunas da lingua tudestga.
Er la Scola auta spezialisada dal Grischun FHGR senta quest squitsch da chattar students e studentas. «I n'è betg simpel», di la presidenta dal cussegl da las scolas autas Brigitta Gadient. «tuts fan reclama natiralmain per questas studentas e per quests students.»
Nus essan confruntads cun in svilup demografic che nus enconuschain – ch'i dat simplamain damain glieud giuvna.
Tuttas duas scolas autas guardan dentant positivamain en l'avegnir. Tar tuts dus s'augmenta il dumber da scolaras e scolars ad in crescher. Tuttina ston els s'adattar adina dapli, din tuts dus – e s'adattar als basegns da la glieud.
Nova strategia
La scola auta spezialisada dal Grischun FHGR va en in nov ciclus da strategia, ha il rectur Gian-Paolo Curcio communitgà davant las medias.
Questa strategia consistia da bleras differentas mesiras – la pli visibla sin il plazzal da construcziun davant la scola auta, nua ch'i vegn construì in nov campus.
Il 2028 vegn il campus ad esser a fin. Lura po la scola porscher plaz a dapli students e studentas – per attrair quels, drovia dentant dapli che be in nov bajetg, di il rectur.
Nus duvrain ina qualitad, che las studentas ed ils students din: Gea, nus vulain ir a la FH Grischun – perquai ch'il cuntegn m'interessescha ed jau sun persvas, ch'jau survegn qua quai ch'jau dovrel.
Per render pli attractiva la scola auta vulan els tranter auter introducir novas purschidas, surtut en il sectur da sanadad – concret duai dar in studi «tgira». Quai studi duai era gidar da cumbatter la mancanza da persunal.
Era fitg impurtant saja d'amplifitgar studis ch'existan gia, manegia il rectur. Ultra dals studis novs, sajan ils studis da nischa anc adina ils pli impurtants – la presidenta da la regenza da la scola aulta, Brigitta Gadient, fa intgins exempels: «In exempel fiss il studi da photonics – tut quai ch'ha da far cun glisch.»
La perscrutaziun è in'incumbensa centrala d'ina scola auta.
In ulteriur focus metta la FHGR sin la perscrutaziun – quai saja ina part centrala per ina scol'auta, manegia Brigitta Gadient. Quai è lur plan fin l'onn 2028, fin che l'emprima fasa da la nova strategia è terminada. Fin lura saja er il plazzal davant la FHGR svanì ed il campus a fin.