Il chantun Grischun sustegna da nov las scolas che na chattan nagina manadra u nagin manader da scola cun la scolaziun necessaria. Da nov vegnan las contribuziuns per persunas che fan la scolaziun supplementara gia pajadas a partir dal cumenzament da la scolaziun, communitgescha la regenza. Quai cun la cundiziun che la scolaziun vegnia terminada cun success aifer maximalmain trais onns.
Chantun surpiglia dapli custs tar midadas necessaris
Cun questa revisiun da l'ordinaziun da scola surpiglia il chantun da nov er ils daners da scola ed ils custs da transport per uffants che ston midar lieu per raschuns specificas che resultan da las mesiras decididas – mesiras sco instrucziun en scola speziala, la tgira lasuenter ubain ina tgira staziunara – pia mesiras che na pon betg vegnir realisadas en la scola actuala. Quai pertutga uffants ch'han impediments d'udida u da la vesida e che han sper la scola regulara anc terapias e programs da promoziun. Per exempel sche in uffant ha in impediment d'udida e discurra rumantsch, po l'uffant ir en ina scola tudestga, per ch'el emprenda la lingua da segns, ch'i na dat betg en la lingua rumantscha. Lura sto la scolara u il scolar pertutgà midar en la scola vischina che porscha questas pussaivladads. Cun quai vegn era realisada l'incumbensa Ulber ch'il parlament aveva dà a la regenza en la sessiun d'october 2021.