Siglir tar il cuntegn

Header

cuntegn

Scola da chant Cuira Chattà nova suprastanza – uschia possia il manaschi cuntiunar

La scola da chant a Cuira po cuntinuar cun ses manaschi. Quai scrivan las gasettas da Somedia. D’ina radunanza dals commembers extraordinaria stersas saja gartegià da remplazzar la suprastanza ch’aveva demissiunà in corpore.

Gist quatter persunas sajan vegnidas da nov elegidas en suprastanza. La situaziun finanziala da la scola da chant resta dentant vinavant precara. Il december aveva il cussegl da la citad da Cuira reagì sin la situaziun e visà las cunvegnas da prestaziun. Co i va vinavant cun la scola, è anc intschert. Cler pari dentant dad esser che la scola da chant vegn a dar si la scola elementara musicala.

La citad aveva visà las cunvegnas da prestaziun

Per segirar las purschidas musicalas en ed ordaifer la scola, ha la citad disdì preventivamain las cunvegnas da prestaziun. Quellas cumpiglian la scola elementara musicala ed ina part da l'educaziun musicala extrascolara. Per l’onn da scola actual emprova la citad da porscher vinavant uschè bain sco pussaivel questas purschidas musicalas.

Pli a lunga vista prevesa la citad da Cuira da fusiunar las purschidas da l’educaziun musicala extrascolara sut in tetg, sco ella scriva. Ina tala incumbensa aveva il parlament da Cuira dà avant quatter onns. Decisiuns pon ins dentant spetgar il pli baud l’emprim quartal dal 2023.

Ils problems da la scola da chant

La fin da l'october ha la scola infurmà la citad davart sia situaziun finanziala difficila, sco er sur da las disditgas da persunal da la direcziun e da l’administraziun. Vitiers saja da spetgar che la suprastanza da la scola da chant na possia betg vegnir remplazzada, communitgescha la citad da Cuira.

audio
Per tadlar: las novitads da las 15:00
ord RTR Audio dals 09.12.2022.
laschar ir. Durada: 3 minutas 44 Secundas.

RTR novitads 14:00

Artitgels legids il pli savens