Quasi mintga di è Burgi Stöger da viadi cun ses trolly per rimnar ensemen viertgels da PET. Questa giada en il Plankis, nua che gidanters èn gia vid reciclar ils viertgels per ella en in satg separat. La dunna da Cuira rimna quellas per sustegnair ina scola da chauns da tschorvs.
En tut rimna Burgi Stäger en duas, trais emnas circa 100 kilos. E quai fa ella en differents lieus: «Davent da Claustra enfin Trun hai jau cunvegnas ch'jau poss vegnir sperasor per ils viertgels». Ils viertgels s'emplunan lura en ses tschaler, nua ch'ella schubregia e controllescha els.
Betg tut ils viertgels èn buns
Dentant betg mintga viertgel da plastic è adattà. «Be quels cun ina serradira ch'ins po volver da plastic dir», pia per exempel da quels da pet ubain tar sosas ubain deodorants. En il Grischun è ella la suletta rimnadra da viertgels. En l'entira Svizra van dentant passa 2000 persunas per il project a la tschertga dals viertgels.
Da temp en temp porta Burgi Stäger lura ses en gronds satgs da 10 kilos e Buchs, nua ch'els vegnan pli tard transportads ad Eschlikon. Qua cumpra ina firma da reciclar ils viertgels per 30 raps il kilo. Ils viertgels vegnan luads ed elavurads tar bischels, ed ils daners van directamain ad ina scola per chauns per persunas tschorvas a Goldach, la «Stiftung Ostschweizerische Blindenführuhundeschule».
Cumprar chagniels cun ils daners
«Nus essan fitg engraziaivels da quest acziun», di Jorge Moreno, il manader da la scola da chauns e instructur da chauns per tschorvs. 4 enfin 6 chauns instruescha la scola mintga onn. Dus onns cuzza il trenament intensiv cun mintga chaun, e tranter 60'000 e 70'000 francs custa la scolaziun. Manada vegn la scola dal tuttafatg entras donaziuns. Cun ils daners dal project da viertgels po la scola cumprar ils chagniels.
Er pervia da Burgi Stäger. En ils 2 onns e mez che'ella va schon a rimnar ha ella gia rimnà passa 4 tonnas viertgels.