Ils scolars e las scolaras da l’emprima classa da Cuira han ina lecziun da musica per emna dapli ch'uffants en auters lieus. E quella lecziun instrueschan scolasts e scolastas da musica externas, emploiads da la Singschule Chur. Ina dad ellas è la scolasta da ritmica e flauta Andrea Peterelli. La ponderaziun dal cussegl da la citad da Cuira, da stritgar quell'ura da musica supplementara, na sa ella betg chapir. I saja stà in schoc per ella e las autras magistras
Nagina chapientscha da la magistraglia da musica
Durant quell'ura supplementara possian ils uffants sa mover, giugar cun la ritmica. I saja in cuntrapais a tschellas lecziuns.
Quellas pussaivladads e libertads n'han ils uffants, tut tenor persuna d'instrucziun da classa, betg tar la lecziun da musica regulara.
Lecziun facultativa n'è nagin'opziun
Per betg stuair desister dal tut ha il cussegl da la citad da Cuira gì l'idea da porscher vinavant la lecziun – dentant sin basa facultativa. La lecziun na vegniss lura betg pli finanziada da la citad ed ils uffants pudessan sa decider per in'ura da musica u per dapli temp liber. Per Andrea Peterelli n’è quai dentant nagina soluziun, tuts duain pudair prender part a quella lecziun ed ella duai vinavant esser part dal plan d'instrucziun.
Potenzial da spargnar 150'000 francs
Perquai rimnan intginas scolastas e scolasts da musica dapi radund in'emna suttascripziuns per ina petiziun. Enfin ussa èn passa 940 vegnidas ensemen.
Era sch'ina petiziun n'ha nagina influenza politica directa, vegnian els a tematisar ella, di il cusseglier da la citad Patrik Degiacomi. Uschè u uschia, Cuira vul spargnar 400'000 francs tar la scola. E pli u main 150'000 spargnassan els cun stritgar quest'ura supplementara ad emna per uffants da las emprimas classas da Cuira.
Nus na vulain betg donnegiar l'educaziun da musica, ma nus stuain resguardar tut las soluziuns pussiblas.
Memia bleras lecziuns
Ils uffants da l’emprima classa hajan dentant gia dapli lecziuns che quai ch'els stuessan. Betg mo da musica, mabain en general. Tras midadas tar il plan d'instrucziun hajan els 27 lecziuns. L'onn 2010 èn quai anc stadas 21. Perquai pudessi esser ch'i vegn da bun da stritgar las lecziuns da musica supplementaras als uffants.
Uschè u uschia, enfin la stad sto il cussegl da la citad preschentar al parlament in plan da spargn. E sche las magistras ed ils magisters da musica – e la finala er ils uffants da l’emprima classa – ston crair vidlonder, gliez vegn a sa mussar.