L'introducziun dal plan d'instrucziun 21 saja reussida bain, scriva il chantun Grischun en ina communicaziun. Cun quest nov plan han tut ils chantuns tudestgs e plurilings il medem sistem da scola. Sis onns è il chantun stà fatschentà d'introducir il nov plan en las scolas grischunas: Il 2016 ha la regenza grischuna decidì da metter en vigur il plan d'instrucziun 21 Grischun sin l'onn da scola 2018/19.
Cun quest nov plan hai dà diversas midadas: Tranter auter hai dà plirs novs roms sco «medias ed informatica» ed il rom «individualisaziun». Plinavant prevesa il nov plan d'instrucziun che scolars e las scolaras emprendan da lavurar pli autonom, co schliar situaziuns problematicas e da reflectar.
Las persunas d'instrucziun han gì d'absolver 435 curs e scolaziuns da la Scola auta da pedagogia dal Grischun per sa preparar sin il mintgadi da scola cun il nov plan d'instrucziun.
Tut è sa calmà
Era sch'i dettia anc differentas sfidas, sajan ins sin buna via. Quai è il tenor da las scolastas e dals scolats ch'èn stads presents a la preschentaziun dal rapport final. Il cumenzament saja stà grev perquai ch'ins n'haja betg propi savì tge che spetgia e co i saja da realisar.
I va vinavant
L'introduziun dal nov sistem da scola è uss suenter sis onns reussida. Cun quai na saja dentant betg finì, di Laura Lutz ch'è presidenta da l'Uniun da magistraglia grischuna.
Nus vegnin vinavant ad observar tge che giaja bain e sch'i dovra midadas. In sistem da scola e ina chaussa infinita.