Davent da quest’emna emprendan scolars e scolaras a chasa. Cunzunt per ils maturands è quai ina sfida perquai ch’ils examens finals vegnan pli datiers. Il cusseglier guvernativ e minister d'educaziun Jon Domenic Parolini declera ch’ils examens finals na vegnan il mument betg spustads. Ins sa tegnia vinavant vid il plan d’instrucziun actual.
Bler resta avert
Il mument n’èsi betg previs da agiuntar in ulteriur semester da scola, presupponì che la crisa da corona na daventia betg mendra e pudess uschia schizunt periclitar l’emprender a chasa. Era da simplifitgar las clausuras na vegnia betg en dumonda. Ins possia però discutar davart la clav da notas e tut tenor sbassar quella.
Perscripziuns igienicas durant clausuras
Las prescripziuns igienicas durant ils examens finals sajan garantidas. Durant las clausuras sesian ils maturands avunda lunsch in ord l’auter. Vinavant appellescha Jon Domenic Parolini a tut ils maturands e maturandas da resguardar vinavant las perscripziuns igienicas da la Confederaziun durant ch'els èn en chasa da scola, en il traffic public u durant las clausuras.