«En la lescha d' aviaziun, respectiv en l' ordinaziun correspundenta che tracta dad aviuns nunequipads, esi reglà cleramain ch' ils chantuns pon far restricziuns. Las singulas vischnancas pon be far quai sch'i vegnan autorisadas dal chantun», declera Urs Holderegger da l'Uffeci federal d' aviatica civila. Ina multa pudess uschia vegnir contestada cun success. Sulettamain il sgular dronas sur fullas da glieud saja en mintga cas scumandà. Sch'i saja be in pèr persunas enturn il lai na tanschia quai er betg sco basa legala.
Vischnanca sco substituta dal chantun
La dumonda è, sche Flem ha consultà il chantun pertutgant quest scamond. Ses departement na saja betg vegni consultà, uschia Gion Cotti, collavuratur giuridic dal Departement da construcziun, traffic e selvicultura. Ch'i dovria in'autorisaziun dal chantun saja bain correct, manegia el. «Ins sto però era dir: Uscheditg ch'il chantun na fa nagut pon ins supponer ina passivitad, quai che autorisescha puspè la vischnanca da decretar quests scumonds sco substituta dal chantun.» La finala po pia il scumond tuttina esser legitims. Sch'ins ha success cun contestar ina multa u betg - gliez na vul Cotti betg dir. Tge che capita vinavant en chaussa scumond da dronas a Flem vegnian ins a decider suenter las vacanzas da stad, lascha el dentant savair.
RR actualitad 11:00