Ils 12 da schaner ha la secziun da chatschadurs da Cuira communitgà sia fin cun in post sin facebook. La raschun saja in problem ch'i dettia gia dapi intgins onns, di Nadine Götz ch'è per il mument l'ultima presidenta da la secziun da chatscha da Cuira: Per ils posts en suprastanza n'è nagin sa mess a disposiziun. Cunquai ch'era anc in ulteriur suprastant aveva ussa demissiunà – quai aveva el dentant gia communitgà in onn avant – fissan els stads mo pli en dus ed uschia na possian ins betg manar in'uniun.
Senza suprastanza na vai simplamain betg.
La secziun da chatscha a Cuira consistiva l’onn passà da radund 80 commembras e commembers. Uschia na sa la mancanza da commembers betg esser il motiv che nagin n’è s’annunzià. Nadine Götz è da l’opiniun ch’i haja da far cun quai che mo pli paucs vulessan surpigliar in post en in’uniun, damai ch’ins ha uschiglio gia avunda enturn las ureglias. Quai saja er il motiv ch'il dumber da commembers da la secziun da chatschaders è sa reducì dapi intgins onns.
Era na datti nagina obligaziun per in chatschader u ina chatschadra d'esser en ina secziun. Sulettamain durant la scolaziun da chatschader sto vegnir collavurà cun ina secziun per pudair absolver las 50 uras da tgira. Durant questas uras fan ils futurs chatschaders e las chatschadras lavurs en il guaud che servan a la selvaschina ed a ses spazi da viver.
In'obigatori dad esser en ina secziun na vegn betg ad esser realistic e probablamain er betg giavischà da tuts.
Malgrà la schliaziun da la secziun da chatschaders da Cuira è Nadine Götz da buna speranza quai che pertutga las secziuns activas. Tenor ella dovri investiziuns en l'infrastructura, sco per exempel vi dals stans da tir, spiert innovativ e surtut era aventuras entaifer las secziuns - quai rinforzia numnadamain il spiert da cuminanza.
Qua chattais fotografias, salids, istorgias ed infurmaziuns enturn la chatscha grischuna.