Entaifer la branscha sajan ins stads da l'avis ch'i dettia adina pli pauc lavur per spazzachamins pervia da las energias alternativas, uschia ha derclerà Michi Hörler, il president dals spazzachamins grischuns envers il schurnal regiunal da SRF.
Capità saja dentant exact il cuntrari – la branscha flureschia. I vegnia mess fitg sin energias alternativas sco stgaudaments da laina, surtut indrizs da pellets da lain dettia adina dapli.
Per l'ina haja la glieud stgaudaments cun pellets e dovra perquai anc il spazzachamin e per l'autra saja er la professiun sa midada. Ina gronda part dals spazzachamins s'occupian ozendi er cun pumpas da stgaudar u indrizs solars – ma i dettia er anc adina quels cun ils stgaudaments classics da lain ni ieli.
E gist là na possian ins betg simplamain laschar star la lavur, malgrà mancanza da persunal. Collegas spazzachamins lavurian per exempel la sonda u pli ditg la saira per dar dumogn.
Impurtant per evitar incendis
Chamins schubers ed indrizs dad arder intacts èn impurtants per evitar incendis. In problem da segirtad na dettia actualmain betg. Ils spazzachamins enconuschian lur regiun e sappian, nua ch'ins stoppia passar pli savens, di Michi Hörler. Per l'avegnir dovria dentant puspè avunda persunal per vegnir suenter cun la lavur.
Actualmain è la situaziun da persunal anc betg uschè nauscha. Mo sch'i va enavant uschia, daventa la situaziun da persunal tar ils spazzachamins problematica.
En il Grischun survegnan ils spazzachamins lur incaricas da l'Assicuranza d'edifizis dal Grischun. Lezza decida tge manaschi ch'è responsabel per tge regiun. Il problem saja enconuschent, di il manader da la sparta protecziun da barschamaints dal Grischun Joachim Maigut. Ins haja perquai er gia fatg midadas per far frunt a las sfidas.
Els possian per exempel esser pli flexibels cun las regiuns per uschia adattar il volumen da lavur u ch'ins dettia sustegn en la tschertga da persunal.
Campagna
Actualmain datti ina campagna cun sustegn finanzial da l’Assicuranza d'edifizis dal Grischun. Tranter auter cun videos en las medias socialas: Giuvens spazzachamins raquintan da lur mintgadi per motivar dapli glieud per la branscha e per mussar che la professiun da spazzachamin è dapli che raiver sin in tetg e schubregiar in chamin.
La finamira è clera: en il futur duessan puspè dapli giuvens e giuvnas grischunas far in emprendissadi sco spazzachamin.
