Senda da ligns - La legenda da Gion Caldar raquintà da nov

Gion Caldar ha cumbattì il nausch chastellan da Sargans e deliberà la Sutselva avant circa 500 onns. Il chastellan ha adina puspè provocà Gion Caldar, per exempel cun laschar ir ses chavals sin sia prada. Cura ch'el ha puspè fatg quai in di, è Gion Caldar daventà uschè furius, ch'el ha mazzà ses chavals. Da quai n'aveva il chastellan nausch insumma nagin plaschair. Gion Caldar è vegnì en praschun ed è pir vegnì ora puspè, cura che sia famiglia l'aveva pudì cumprar liber.

La legenda da Gion Caldar sco teater 1990

Cura ch'el era puspè liber, è il chastellan in di vegnì sperasvi a gentar, senza invitaziun. Là ha el empruvà in tschadun da la schuppa che la dunna da Gion Caldar ha cuschinà – e cura ch'el ha pruvà, ha el spidà en disgust en la stgadella. Gion Caldar è daventà fitg grit ed ha tschiffà il chastellan vi da la tatona e smatgà el en la schuppa. Quai ha el fatg uschè ditg, fin ch'il chastellan è mort.

Senda da ligns

Precis questa legenda è il fil cotschen da la senda da ligns «TrailCaldar» che la tschintgavla e sisavla classa da la scola da Donat ha fatg sco project. Il «TrailCaldar» va d'Andeer fin Farden. Mintga post raquinta ina part da la legenda da Gion Caldar. Ils ligns gidan per chattar il proxim post.

Davent da la plazza da gieu ad Andeer datti 12 posts sin ina via da var tschintg kilometers. Il «TrailCaldar» maina tras il guaud, sper la tur da Cagliatscha ora e tras trais vitgs.

L'inspiraziun per questa via è vegnida durant in viadi da scola, raquinta la scolasta Bettina Nicca. Sin quest viadi da scola a Thun hajan els fatg in uschenumnà «Fox Trail», in senda cun ligns. Quai als haja plaschì uschè bain ch'els hajan ils proxims dus mais sezs creà uschè ina senda. Las scolaras ed ils scolars han zambregià posts, inventà ligns ed elavurà ina ruta. Cun quai n'èn els betg adina stads perina.

Els èn la finala tuttina sa decidids per il num «TrailCaldar». Quest trail saja fatgs per quasi mintgina e mintgin, din ils uffants – auter sch'ins na discurra ni tudestg ni rumantsch u sch'ins è uschè vegl ch'ins na po betg pli ir bain. Ma sch'ins sa dat fadia e legia exactamain las tavlas, saja pussaivel da pudair schliar il trail.

Sco persuna estra emprendan ins ad enconuscher la legenda da Gion Caldar sin quella senda. Però blers en Val Schons enconuschan gia questa istorgia da pitschen ensi. Ed era sch'ins pudess crair, na chattan ils uffants l'istoria betg uschè brutala. En mintga cas betg memia brutal per ina senda da ligns.

Ils scolars e las scolaras èn cuntents cun lur lavur e s'allegran da survegnir ulteriurs resuns da visitadras e visitaders.