La Polizia chantunala dal Grischun avertescha danovamain dad uschenumnads cloms da telefon da schoc. Vul dir cloms cun ina novitad che schochescha, colliads cun la pretensiun da pajar ina summa. En da quests cas saja immediat da pender si il telefon.
Surdà 100'000 francs suenter telefon da schoc
La polizia chantunala scriva d'in cas concret ch'è succedì mardi suentermezdi a Cuira. Ina seniora dad 87 onns ha surdà ad in um nunenconuschent dapli che 100'000 francs suenter in tal clom da telefon da schoc. Avant aveva ina dunna al telefon pretendì d'esser ina procuratura publica e declerà che la figlia da la seniora haja gì in accident cun l'auto, e pervida quel saja morta ina dunna, uschia ch'ins stoppia pajar ina cauziun. La dunna haja sinaquai surdà ils daners ad in um che spetgava avant la porta da chasa. La polizia chantunala investighescha.
