Siglir tar il cuntegn

Header

video
151 milliuns per in nov campus da la FHGR
Or da Telesguard dals 18.10.2022.
laschar ir. Durada: 3 minutas 19 Secundas.
cuntegn

Senza cuntravusch 151'000'000 francs per campus da la FHGR

In emprim pass ha il project campus fatg: Il Cussegl grond ha deliberà il credit da 151 milliuns francs. Il mars decida anc il pievel en chaussa.

Curt avant gentar han deputadas e deputads concedì senza cuntravusch il credit per in nov campus da la Scola auta spezialisada dal Grischun a Cuira. Quasi tut las deputadas e deputads han fatg attent ch'il Grischun saja dependent da persunal qualifitgà e stoppia pussibilitar a giuvnas e giuvens da sa scolar en il chantun. La FHGR porschia gist questa schanza.

Sco il cusseglier guvernativ Mario Cavigelli ha ditg sin dumonda dad RTR n'ha el anc mai en sia carriera dumandà il Cussegl grond per ina uschè auta summa per realisar in bajetg. Perquai saja er l'investiziun totala da 178 milliuns francs il maximum – dapli daners per ademplir ulteriurs giavischs aifer il project na dettia betg. La chareschia è bain gia resguardada cun 16 milliuns francs en las calculaziuns. Sche quella sa sviluppescha dentant vinavant uschia sco actualmain, pon ils custs tuttina anc s'augmentar.

audio
Intervista cun Mario Cavigelli
ord Actualitad dals 18.10.2022.
laschar ir. Durada: 3 minutas 29 Secundas.

Il pli char project

Avrir la box Serrar la box

Per cumparegliar las summas per auters projects da construcziun dal chantun (menziunà è qua adina il credit ch’il Cussegl grond ha deliberà):

  • Construcziun da la praschun a Cazas: 86 milliuns francs
  • Bajetg per l'administraziun chantunala «sinergia» a Cuira: 69 milliuns francs
  • Renovar il bajetg statal sco sedia per la Dretgira superiura a Cuira: 29,2 milliuns francs (votaziun suonda il november)
  • Renovar mensa e mediateca a la Scola chantunala a Cuira: 27 milliuns francs

Credit betg dispitaivel

En tut planisescha il chantun investiziuns da 178 milliuns francs (151 milliuns da chantun e 27 milliuns francs da la Confederaziun). In u l'auter deputà ha bain in zic mal il venter en vista a tals custs – tuttina n'è il project sco tal betg dispitaivel. L'ultim pled e chapitel han Grischunas e Grischuns en ina votaziun a l'urna il mars 2023.

La Scola auta spezialisada dal Grischun dorvia dapli spazi, cunquai che adina dapli persunas studegian a Cuira. Ed il nov center duai concentrar a la Pulvermühlestrasse l'infrastructura da la scola ch'è oz repartida en tschintg lieus a Cuira.

Pli car che previs - la Regenza declera

Bunamain la mesadad pli bler che planisà avant quatter onns duai il nov bajetg da la Scola auta spezialisada dal Grischun a Cuira custar. La scola haja giavischà spazi supplementar da 3'150 meters quadrat, ha ditg il cusseglier guvernativ Mario Cavigelli tar la preschentaziun dal project questa stad. Sch’ins investeschia, lura veglian ins far quai endretg. Ulteriurs motivs per ils custs pli auts, saja per l'ina la chareschia e ch'ils basegns tar ils meds d’informatica sajan creschids.

audio
Il nov campus da la FHGR vegn pli char che spetgà
ord RTR Audio dals 10.08.2022.
laschar ir. Durada: 24 Secundas.

Sch’il Cussegl grond ed ils votants e las votantas dal Grischun dattan glisch verda duain las lavurs cumenzar en circa dus onns. Il 2028 pudess la scola lura cumenzar en il nov bajetg. L'edifizi nov duai augmentar las schanzas da furmaziun da la giuventetgna e far frunt a la mancanza da persunas spezialisadas en las interpresas indigenas.

video
Nov bajetg per la FHGR
Or da Telesguard dals 25.10.2021.
laschar ir. Durada: 2 minutas 36 Secundas.

Project «Partenaris» ha persvas

Realisà vegn il project «Partenaris» dal biro d'architectura Giuliani Hönger Architekten da Turitg che haja sur tut persvas entras quai ch'el adempleschia ils criteris d'architectura, entras sias travs e persistenza cun resguardar la funcziunalitad integrala. Il project persvadia er entras quai ch'el resguardia bain ils bajetgs existents che stattan en il conturn ed er tras quai che l'exteriur saja creà sco parc. Quai procuraia per ina bun'atmosfera e creeschia pussaivladads da s'inscuntrar sin il campus. Plinavant resguardia il project er ina tscherta flexibladad dal diever, quai che saja central per il svilup da la scola auta.

purtret dals bajetgs ensemen cun il conturn.
Legenda: Visualisaziun dal center en il conturn da la Pulvermühle a Cuira. MAD, Departament d'infrastructura, energia e mobilitad

Scola dovra dapli plaz

Ils ultims onns è il dumber da studentas e students, sco er il volumen da perscrutaziun creschì continuadamain a la FHGR. Quai ha chaschunà che la scola ha stuì fittar adina dapli stanzas ordaifer l'atgna scola. Oz ha la Scola auta spezialisada da Cuira total tschintg lieus nua ch'i vegn instruì e lavurà en la citad Cuira. En quels lieus manca dentant il plaz per pudair extender e sviluppar la scola. Per pussibilitar il svilup a la scola ha il Cussegl grond decidì il 2018 da realisar il center per la FHGR a la Pulvermühle ed ha incumbensà la regenza da scriver ora il project.

audio
Tge è previs?
ord Actualitad dals 25.10.2021.
laschar ir. Durada: 3 minutas 16 Secundas.

Da muntada chantunala

Da realisar il center da la Scola auta spezialisada, saja per il chantun da gronda muntada, quai ord vista politica da furmaziun, perscrutaziun ed innovaziun. La mancanza da persunal dal fatg, en spezial en disciplinas tecnicas e da las scienzas natiralas, engrevgescha ad interpresas da sa sviluppar e crescher. En quest conturn è la FHGR in impurtant actur, scriva la regenza. Quai per scolar persunas e promover il medem mument l'economia grischuna.

RTR novitads 12:00

Artitgels legids il pli savens

Scrollar a sanestra Scrollar a dretga