Senza gronda discussiun - La gulivaziun da finanzas è in success
La gulivaziun da finanzas en il Grischun è in success. A questa conclusiun vegn la regenza grischuna ch'ha analisà l’effect dals onns 2016 fin 2018 – pia ils emprims trais onns dapi l’introducziun dal nov sistem. Deputadas e deputads han tractà senza grondas discussiuns quest tema.
Il Cussegl grond ha prendì per enconuschientscha il rapport ed ha fatg pitschnas adattaziuns en la lescha. Il resultat è stà cler cun 108:0 vuschs.
Tut las finamiras sajan ademplidas. A quest facit vegn la regenza grischuna en ses emprim rapport davart la gulivaziun da finanzas, che vala dapi l'onn 2016 en il Grischun. Quai vul dir: Quest sistem da pajaments rinforza en emprima lingia l’independenza finanziala da las vischnancas. La gulivaziun da finanzas reduceschia dentant era differenzas da prestaziuns e da taglia tranter las vischnancas e sustegn vischnancas ch'han custs extraordinaris.
Tge è la gulivaziun da finanzas?
Avrir la boxSerrar la box
Il Grischun differenziescha tranter pliras categorias:
La gulivaziun da resursas duai reducir las differenzas finanzialas: Vischnancas fermas ston pajar – vischnancas flaivlas survegnan daners. Sco indicaturs valan la populaziun e las persunas che pajan taglia. Ils onns 2016-2020 han vischnancas fermas pajà en media 18,5 milliuns francs entant che vischnancas flaivlas han survegnì 26,7 milliuns francs. La differenza da bun 8 milliuns francs ha il chantun contribuì.
Tar la gulivaziun da grevezzas vegn differenzià tranter trais categorias:
I dat daners per grevezzas topograficase per la scola (p.ex. vischnancas cun auts custs pervia da bleras vias e che han in’auta quota da scolaras e scolars). Questa summa da 24 milliuns francs paja il chantun cumplainamain.
Vischnancas cun bleras persunas che dovran agid social survegnan ina gulivaziun per grevezzas socialas. L’onn 2018 ha il chantun pajà 4,6 milliuns francs.
Da la gulivaziun per grevezzas extraordinarias n’ha il chantun anc mai stuì far diever. Daners pudessan vischnancas survegnir ch'han custs en connex cun eveniments ch’ellas na pon betg influenzar.
Tuttina adattar la lescha
Sin basa da quest emprim rapport ha il Cussegl grond era revedì la lescha davart la gulivaziun da finanzas. I sa tracta dentant da pitschnas adattaziuns co quintar ils indicaturs per savair tge vischnanca che ha da bun quants daners.
Cun realisar la STAF – la refurma fiscala e la finanziaziun da l’AVS – stattan a disposiziun circa 7 milliuns francs ord la taglia federala directa. Daners ch’igl è da reparter sin las vischnancas ch'han perditas entras la STAF.
Il sistem actual da la gulivaziun da finanzas datti dapi l’onn 2016. La regenza grischuna è obligada d’analisar periodicamain sche quest instrument è effizient ed ha perquai fatg in emprim rapport che sa basa sin ils rendaquints 2016 fin 2018 da las vischnancas.
Per l'onn 2021 ha la regenza gia fixà las contribuziuns: