Sin fundament da la situaziun da pandemia sa midada restrenscha la citad da Cuira sias infrastructuras per activitads d'uniuns ordaifer la scola. Sco quai che la chapitala grischuna communitgeschan, sajan pertutgadas localitads da scola, hallas da gimnastia da la scola da la citad e da la scola professiunala sco er indrizs da sport ed occurrenzas. Per il sport d'elita dettia excepziuns. Questa mesira vala davent la sonda ils 23 da schaner e resta en vigur almain fin ils 7 da mars.
Betg simpla decisiun
Tenor il cusseglier da la citad, Patrik Degiacomi, na saja quai betg stà ina simpla decisiun. I saja enconuschent, che activitads ordaifer scola saja fitg impurtant per uffants e giuvenils. Dentant restricziuns sco lecziuns en classas parzialas e serradas da scola sajan anc pli gronds ristgs. Per il cussegl da citad stettia en emprima lingia la protecziun dals uffants e giuvenils e lur famiglias.