Las plazzas da terapia per giuvenils ed uffants èn fitg limitadas en il Grischun. Cun las 5 plazzas provisoricas hai total lieu per 12 pazientas u pazients tar ils Servetschs psichiatrics dal Grischun. Cunzunt durant quest temp da l'onn s'accentuescha però la situaziun, di Heidi Ekrich, la directura medicinala da la psichiatria per uffants e giuvenils.
Stan oz pudessan nus occupar il dubel dals letgs che nus vain a disposiziun
Insumma naginas plazzas da terapia han ins actualmain per uffants, pia per pazientas e pazients fin a 12-14 onns. Els vegnan tractads en la clinica d’uffants da l’ospital chantunal u ordaifer il chantun. La nova clinica, che ha mesemna gì l’emprima badigliada, duai serrar quella mancanza. Sche tut va tenor plan va quella però pir en funcziun l'onn 2026.
Surmuntar il temp enfin l’avertura
L’emprim pass per surmuntar il temp enfin l’avertura sajan stadas las tschintg plazzas da terapia provisoricas, di Heidi Eckrich ed agiunscha ch’i vegnia constant examinada la pussaivladad per dapli. Da realisar quella na saja dentant betg uschè simpel.
Las premissas per pudair offrir ina plazza staziunara per uffants a moda suffizienta èn fitg autas
Per pudair porscher ils tractaments nua ch’els èn urgents sa drizza la glista da spetga tenor basegn terapeutic empè da data. Pazientas e pazients cun problems acuts, sco per exempel anorexia, tschertas toxicomanias u patratgs da suicidi duain vegnir tractads sco emprims u cun agid d’autras clinicas. Durant il temp da spetga duain er purschidas supplementaras sco tractaments ambulants u midadas da la situaziun da scola gidar.
Tar la clinica Waldhaus a Cuira hai mesemna dà l'emprima badigliada per la nova clinica da psichliatria d'uffants e giuvenils. Cun 50 milliuns francs vegn il project però 10 milliuns pli char che quintà oriundamain, sco ch'ils Servetschs psichiatrics dal Grischun scrivan en ina communicaziun.
Ils ultims onns hai adina dà dapli dumondas per plazs staziunars ed ina clinica dal di per uffants e giuvenils. Il 2019 aveva il cussegl d'aministraziun dals Servetschs psichiatrics perquai decis da realisar la nova clinica. La nova clinica, che vegn a cumpigliar dus bajetgs, vegn a porscher:
- 21 plaz da tgirar staziunars
- 7 plaz da clinica dal di
- Parzialmain ina scola per la clinica ed ina halla da gimnastica
Il mars 2023 cumenzan las lavurs da bajegiar. Tar in cas d'ina dumonda pli gronda en il futur han ins resguardà en la planisaziun era la pussaivladad da bajegiar ulteriurs edifizis.
