Ils giuvenils e las giuvenilas tranter 15 e 25 onns han durant dus dis pudì savurar aria politica. La finamira da la sessiun dals giuvenils, ch'è vegnida averta dal president dal Cussegl grond Tarzisius Caviezel, è da formular differentas pretensiuns concretas per la politica grischuna – quest onn davart las trais tematicas sanadad, societad ed era energia ed ambient. A la fin han ils giuvenils surdà 17 pretensiuns al president da la regenza grischuna Marcus Caduff sco represchentant da la politica grischuna. Las pretensiuns eran tranter auter il giavisch d'extender la rait da vias da velo en las citads, da promover indrizs solars, da finanziar pli fitg la chasa da dunnas a Cuira e d'introducir ina paja minimala.
Inspiraziun dad expertas ed experts
En trais gruppas han ils participants e las participantas sco emprim pudì tadlar plirs referats dad experts ed expertas sur las differentas tematicas. Tranter auter ha il manader dal stab directiv, cusseglier guvernativ nov elegì Martin Bühler discurrì davart co ir enturn cun situaziuns da crisa e la deputada e media da dunnas Xenia Bischof ha referì davart sanadad ed educaziun sexuala. Las giuvnas ed ils giuvens han pudì far dumondas ed ins ha sentì che l'interess ed il plaschair vi da la politica era qua.
Suenter ils referats han els elavurà emprimas variantas da las pretensiuns – ch'èn la dumengia lura vegnidas discutadas en il plenum per definir tgeninas che duajan vegnir udidas dals politichers e las politicras dal Grischun. Il punct culminant da quella lavur è alura stà la dumengia suentermezdi cun la surdada da las pretensiuns al president da la regenza Marcus Caduff. La regenza è numnadamain obligada da dar resposta a quellas pretensiuns che la sessiun dals giuvenils ha surdà quella fin d'emna.
Las pretensiuns han effect
Che las pretensiuns da la sessiun da giuvenils pon purtar fritg sa mussa vi da l'exempel dal dretg da vuschar gia a partir da 16 onns. Ils giuvens e las giuvnas han inoltrà quella pretensiun, suenter è ella vegnida acceptada dal Cussegl grond. La regenza sto ussa far ina proposta co midar la Constituziun chantunala per midar il dretg da vuschar, suenter datti anc ina giada ina debatta en il Cussegl grond e lura anc ina votaziun dal pievel.
