Sfidas da durmir - I na sto betg exnum esser 8 uras per notg

Raschuns per durmir mal datti bleras, saja quai cun in ritmus da sien regular u irregular. En il mument è franc era la chalira la culpa ch'intgins ed intginas da nus dorman mal. Uschia vai era ad Annina Gees. Ella è dapi 7 onns tgirunza diplomada en l'Ospital chantunal a Cuira ed enconuscha las sfidas da durmir irregular. Per ella saja mintgamai l’emprima notg suenter u avant in nov servetsch stada la pli gronda sfida. Uss ha ella dentant il cletg da betg pli stuair lavurar notgs. Quai fetschia tut bler pli simpel, sco ella di.

In’autra persuna che cumbatta cun ina sien irregulara è Seraina Albin, mamma d’ina poppa da prest dus onns. Ins haja betg pli las medemas aspectativas vid las notgs sco avant l'uffant, uschia Seraina Albin, oriunda da Schluein. Per ella saja mintgamai ina sfida da parter il letg cun sia figlia. Uschia n'è la sien betg pli uschè profunda sco avant.

Enconuschan las sfidas dal durmir irregular

Era Claudio Albin, Maître de Cabin, che lavura gia dapi passa 11 onns tar la Swiss enconuscha bain las sfidas dal sien irregular. Però, el haja il cletg d'avair ina fitg buna sien e saja era disà bain vid quel ritmus irregular, di il giuven da 32 onns vinavant.

Prender tut pli luc, tadlar bain sin il corp e betg metter sasez sut squitsch

Impurtant per pudair sa recrear saja segir da tadlar bain sin tge che fetschia bain ad ins e betg da metter sasez sut squitsch, raquinta Claudio Albin oriund da Trun. Era el ha chattà ora inqual tric co el vegn da tancar il meglier energia. Per exempel, prenda el la libertad da durmir in di l'emna gist sco el vul. Seraina Albin guarda dad adina puspè prender temp per ella, uschenumnada «me-time». Saja quai cun yoga u cun vesair amias, quai gidia era da chargiar las battarias.

E sch’ins ha puspè ina giada ina schleta notg, lura gida segir era il credo d’Annina Gees che di, che sien saja be sien. Sch’ins dormia mal ina notg, lura vegnia prest ina proxima nua ch’ins possia ir pli baud a letg.

Ina persuna che enconuscha era bain las sfidas dal durmir è dr. med. Cristina Caporale. Ella è neurologa, experta da sien e lavura gia dapi il 2017 en il labor da sien da l'Ospital chantunal da Cuira. Tenor ella na dovran betg tuttas e tuts en media 8 uras sien per notg. Impurtant saja da chattar ora quantas uras sien che sajan optimal per ins sez. Quai giaja il meglier durant il temp da vacanzas.

Las bleras u ils blers da nus vegnian da cumpensar bain la sien. Quai munta che sch’ins dormia durant l’emna mal, lura possian ins pigliar suenter quella sien la fin d’emna. Mo adatg: betg tar tuttas e tuts funcziunia quai, uschia la media. Lura saja impurtant da guardar bain dad era ir durant l’emna ad uras in letg per vegnir sin quellas uras.

Tuttina sch’ins ha ina sien regulara u irregulara, la finamira durant il durmir saja la recreaziun e da bajegiar giu il stress dal di passentà. Uschia vegnian ins er puspè fit per il proxim di. Perquai saja ina buna sien insatge fitg impurtant.