L'Ospital chantunal sto cumbatter per che las purschidas fitg spezialisadas restan a Cuira. L’onn passà han els per exempel cumbattì cun success per la staziun intensiva per uffants. Suenter ch’in gremi aveva decidì da serrar la staziun, hai dà ina petiziun cun passa 30’000 suttascripziuns. Autras purschidas èn dentant en privel, per exempel las operaziuns da cancer a la pancrea ed al begl.
Tar mintga tractament spezialisà èsi scrit avant che l'ospital sto avair in tschert dumber da cas ad onn. Il tractament po pia be restar sche quest dumber vegn cuntanschì. Tar intgins tractaments saja quai in cumbat – ins stoppia dentant era esser sincer cun sasez e pront da dar giu intginas chaussas, manegia Thomas Fehr, il manader da la medicina interna en l'Ospital chantunal dal Grischun. Tar il cancer al schiliez hajan els ils ultims onns per exempel gì circa 10 operaziuns ad onn – quai na bastia betg per mantegnair il tractament.
La decisiun sch'in tractament resta u betg fa in organ interchantunal –senza discussiun politica e senza discussiun da la societad. Da guardar ch'i dat avunda cas fetschia era senn perquai ch'i è pli attractiv per medis e medias da lavurar a Cuira sch'els han regularmain cas en lur partiziun. En pli segireschia la rutina era la qualitad da lavur.
Cumbat per las tariffas
En pli resta er il tema da las tariffas ina sfida, malgrà midadas planisadas dal Cussegl federal. Il CEO da l'ospital di, che las tariffas en Grischun èn memia bassas. Ils raps che vegnan dal chantun e da las cassas da malsauns na cuvrian betg ils custs. Dapi diesch onns èn las tariffas tar 83 raps. Il chantun ha quinta ora e vulì a partir dal 2019 in pretsch da 90 raps. Dapi lura è l’ospital en ina procedura giudiziala cun las cassas da malsauns pervia da quest pretsch.
A partir dal 2026 sa mida il sistem da las tariffas, ha il Cussegl federal decidì. Da quai na profiteschian dentant ni ils ospitals, ni las pazientas ed ils pazients. Il nov sistem fa ils pretschs tranter ils singuls tractamaints pli fair, en general duai il pretsch però restar medem. Questa midada haja tenor Hugo Keune pia nagin'influenza sin la svieuta da l'Ospital chantunal.
Ospital chantunal scriva cifras cotschnas, malgrà auta svieuta
L'ospital chantunal a Cuira stat vinavant sut squitsch pervia da las bassas tariffas e la chareschia. L'onn passà è sa resultà in minus da prest 340’000 francs suenter amortisaziuns. Il 2023 aveva l'ospital anc fatg in gudogn da 2,6 milliuns francs.
Sut questas cundiziuns difficilas essan nus cnap cuntents cun il resultat.
Quai malgrà che la svieuta è creschida per passa 5% sin 543 milliuns francs, sco quai che l'ospital communitgescha. Tuttina restia il resultat da l'interpresa suenter amortisaziuns negativ. Tut en tut ha l'ospital tractà dapli pazientas e pazients. Tar il tractament staziunar è il dumber creschì sin passa 25’000. Pervia da las tariffas «bler memia bassas» na vegnian ins però betg da cuvrir ils custs, vegn cità il CEO da l'ospital chantunal, Hugo Keune.
Per l'ospital chantunal è l'integraziun da Samedan giud maisa
Quai han il president da la Fundaziun Ospital chantunal Grischun Martin Schmid ed era il CEO da l'ospital Hugo Keune ditg en il rom d’ina conferenza da medias ad RTR.
Cunquai che gia pliras vischnancas han votà Na, n'è quest plan da l’integraziun il mument betg pli tema per l'ospital a Cuira. Questa integraziun avess numnadamain duvrà il Gea da tut las 11 vischnancas da l’Engiadin’Ota. En l'avegnir è l'ospital chantunal dentant avert per ulteriuras propostas d'integraziun.
La balla saja ussa dentant tar l'ospital a Samedan, ha ditg il president da la fundaziun da l'ospital chantunal, Martin Schmid.
Success medicinals e digitalisaziun
Er sche l’ospital chantunal haja scrit cifras cotschnas haja dà progress en il provediment medicinal ed en la digitalisaziun. Per exempel saja reussì da spindrar la staziun intensiva per uffants, quai grazia al sustegn da la populaziun. In ulteriur svilup impurtant saja stà la stabilisaziun dal Center da tumor sut la direcziun da prof. dr. Roger von Moos e da prof. dr. Richard Cathomas. Il center haja survegnì pliras certificaziuns renumadas che confermian la auta qualitad. Er en la digitalisaziun haja il KSGR fatg progress cun automatisar activitads manualas e cun introducir in nov portal per directivas da tgira. L'implementaziun da roboters da software mussia las stentas da tegnair pass cun innovaziuns tecnologicas e da reducir la chargia da lavur dal persunal.
Scolaziun ed infrastructura
Durant l’onn 2024 hajan 814 persunas fatg u l'emprendissadi, practicums e percurs da studi tar l'ospital chantunal. Er offrescha l’ospital novas professiuns d’emprendissadi per satisfar al basegn da persunal qualifitgà. Ultra da quai giaja il progress da construcziun da la part nova da l'edifizi tenor plan. L’avertura vegnia ad avair lieu avant la stagiun d’enviern 2026/2027.