La naiv è vinavant bramada ed era sch'i duai dar in pèr flocs la dumengia – 5 enfin maximal 10 centimeters en il grischun dal nord – resti anc adina rar. Sin tranter 1'300 è 1'700 meters è il cunfin da naiv la dumengia tenor prognosa actuala dad SRF Meteo. A partir da glindesdi stoppian ins però uschè u uschia betg pli discurrer da quel indicatur, di il meteorolog Jürg Zogg. Lura duai l'aura puspè vegnir pli miaivla.
Il glindesdi datti sin 2'000 meters fin a 3 grads, il mardi perfin 7 grads.
Almain ina schanza sin naiv duai dar la segunda mesadad da l'emna che vegn. Tenor las calculaziuns actualas sajan las schanzas 50:50 tranter ina front fraida e punas premissas per naiv nova u ina continuaziun da l'ora amabla e favugn dal sid.
In mez meter sut la media annuala
Cumpareglià cun la media dals ultims onns dettia en blers lieus gnanc la mesadad da la naiv. A Mustér datti tenor la charta da naiv da l'Institut federal per la perscrutaziun da naiv e lavinas (SLF) nagina naiv, empè da bunamain in mez meter en media. A Bivio dettia 27 empè da 78 centimeters ed er en la regiun Motta Naluns a Scuol sajan ins cun 39 centimeters passa in mez meter sut la media dals ultims onns. Era per naiv artificiala èn las premissas grevas. Far ir in chanun da naiv fetschia senn tenor il SLF tar maximal minus 2 grads.