Daco che l'aua da baiver è tschufragnada han ins entant almain per part pudì constatar. Sco il president communal da Küblis Thomas Gort ha ditg envers RTR, sa tractia il pli probabel da diesel. Da tge quantitad da l'ieli mineral ch'i sa tractia na saja dentant betg enconuschent. Quel è arrivà en la tschiffada da funtauna Abibela, che sa chatta sin il territori da la vischnanca da Claustra. E da là en il provediment cun aua da baiver da la vischnanca da Küblis.
En ina communicaziun scriva la vischnanca, che la Polizia chantunala haja cumenzà a far investigaziuns. Quai ensemen cun l’Uffizi chantunal per la natira e l’ambient e cun la Procura publica dal Grischun. Actualmain emprovan ins da nettegiar las lingias d’aua. Damai che questa lavur è difficila e dovra ses temp, sto la populaziun da Küblis era ir la fin d’emna per aua schubra tar ils tancs plazzads en plirs lieus dal vitg.
La gievgia da mezdi aveva la vischnanca da Küblis communitgà, ch'emprimas provas da l'aua parian schubras. I dovria dentant anc dapli emprovas per pudair dir ch'ils consum na saja betg problematic.
Provisoris d'aua per la populaziun
Enfin ch'igl è puspè pussaivel da baiver l'aua a Küblis datti installaziuns provisoricas per aua da baiver e quai en quatter lieus en vischnanca, quai ha ditg il president communal Thomas Gort envers RTR. Co ch'ins vul proveder l'aua per ils manaschis agriculs n'è actualmain anc betg cler. I possia durar plirs dis enfin ch'ins haja schlià il problem. Pertutgadas èn radund 900 persunas.
La mesemna baud avevan ils responsabels constatà che l'aua da Küblis saja contaminada. Las provas vegnan anc analisadas. Entant avertescha la vischnanca da betg utilisar u baiver l'aua, era betg sch'ins fetschia l'emprim buglir ella. E sch'ins haja sintoms sco fevra u diarrea aifer las proximas 36 uras, duain ins consultar il medi. Daco che l'aua da baiver saja contaminada, na saja anc betg sclerì.
