Las soluziuns da serrar vitgs per il traffic che guntgeschia na saja betg ina soluziun a lunga vista. Per l'ina dettia uschia colonnas enavos sin l'autostrada e sin via chantunala e per l'autra funcziuneschia quella mesira be cun persunal che diregia il traffic. Ed engaschar persunal saja er ina dumonda da custs. Quai è il facit da la segunda maisa radunda tranter represchentants da chantun, Confederaziun, regiuns e vischnancas.
La situaziun è cumplexa, perquai na pudain nus er betg prender ina soluziun ord il truclet. Nus stuain tschertgar las soluziuns cun far experientschas, per exempel cun da quests pilots.
Ina schliaziun definitiva per il problem dal traffic na datti dentant actualmain betg, malgrà ch'ils emprims pass mussan en la dretga direcziun. Las experientschas da questa stad vul il chantun nizzegiar per planisar il traffic d'enviern e da primavaira 2023.
Er las vischnancas pertutgadas sco Razén, Panaduz e Zezras han ditg sin dumonda dad RTR ch'il process giaja en ina buna direcziun, la situaziun saja cumplexa. La primavaira vegnan installadas gruppas da lavur per las regiuns pertutgadas. Sin basa da las experientschas fatgas ed ils basegns dals involvads vegnan alura elavuradas mesiras a pli lunga vista.
Spetgà bler traffic l'enviern
Pertutgadas il pli fitg dal traffic turistic da l'enviern èn las vischnancas da Schiers, Grüsch, Jenaz, Landquart sco er la citad da Cuira, Trimmis e Zezras. Surtut durant sis u set fins d'emna èsi da quintar cun fitg bler traffic – quai tranter il december enfin l'entschatta da mars. Il november vul il chantun preschentar mesiras per ulteriurs projects da pilot ch'ins vul far l'enviern per dar dumogn al traffic d'enviern. Er questas experientschas duain lu gidar da chattar soluziuns a pli lunga vista.
Questa primavaira e stad avevan ins serrà las vias tras ils vitgs da Panaduz e Razén per il traffic da transit – quai per reducir il traffic.
