Siglir tar il cuntegn

Grischun Skis, ensolver e discussiuns

Per l'emprima giada èn il 7 candidats che candideschan per la regenza grischuna sa preschentads tuts ensemen. Sulet Christian Rathgeb ha mancà pervia da malsogna. Ils candidats èn ids ensemen cun skis, han giudì in ensolver ed han discutà davart pendicularas.

Tut ils 7 candidats per la regenza grischuna vulevan esser da la partida a Laax. Il cusseglier guvernativ Christian Rathgeb ha dentant betg pudì esser da la partida pervia d'ina grippa. Ils auters han sco emprim giudì in pèr rundas sin ils skis. E quai gia la damaun a las 7 – avant la gronda fulla. Sulet Peter Peyer è pir vegni vitiers pli tard, el na va betg cun skis.

Ils candidats, ensemen cun directurs da pendicularas e persunas dal turissem, han pudì giudair la pista per sasez, tranter il Crap Sogn Gion e Plaun. La tschajera n'ha dentant betg fatg uschè simpel d'insumma vesair la pista.

Politica duai sustegnair las pendicularas

Suenter il divertiment sin pista ed in ensolver, hai dà ina discussiun davart lass rollas da la politica tar las pendicularas. Ils directurs da pendicularas giavischan da la politica, ch'i vegnia fatg tut il pussibel per simplifitgar da realisar projects per renovar u bajegiar novs indrizs.

Ils candidats per la regenza grischuna han discutà sin il Crap Sogn Gion cun directurs e schefs da pendicularas e turissem.
Legenda: Ils candidats per la regenza grischuna han discutà sin il Crap Sogn Gion cun directurs e schefs da pendicularas e turissem. mad

RR actualitad 17:00