3'000 maisas solaras èsi d'installar: mintgina trais fin tschintg meters auta, e set meters lada. Quellas vegnan fixadas cun quatter chommas d'atschal en il terren. Sin questa platta da la maisa èn installads mintgamai sis panels solars. Quai è la dimensiun dal project solar Madrisa.
Malgrà questa gronda quantitad da maisas progredescha il project pli svelt che pensà. Oriundamain eri previs d'installar 300 maisas fin la fin da 2025, quai che correspundess a 10% da l'entir project. Quai vegnia pli che cuntanschì, di il manader dal project da la Repower, Fabio Maurizio. Gia avant ch'il mais da settember è passà stattan 500 maisas, e 3'000 moduls solars èn montads.
Las persunas èn uschè rutinadas sco quai ch'ins sto esser en in team. Uschia pon ins far la lavur svelt e segir.
Pli gugent sgular il material che donnegiar il terren
Per pudair installar quellas maisas er en territoris pli stips e sin 2'000 meters sur mar, nizzegian las firmas involvidas helicopters. Ina giada che las maisas èn arrivadas al lieu, èn quellas montadas en var ina minuta. Alternativas pli ecologicas che sgular il material al lieu, fissan cranas e camiuns. Cun la crana cuntansch'ins dentant mo in tschert radius, e lura stuessan ins adina puspè far novas pistas e vias per dischlocar ella. Quai na vul ins però betg far, per proteger il terren. Perquai è la Repower sa decidida per lavurar cun helicopters.
Il lieu sin 2'000 meters sur mar ha però era avantatgs. Per exempel ch'ins è sur il cunfin da tschajera, che po numnadamain esser d'enviern sin 1'500 meters sur mar. Perquai pon ins era cumenzar a producir energia gia il november – sco quai che las prescripziuns dal «Solarexpress» pretendan.
Termin final resta la fin 2027
Actualmain è il project solar Madrisa en avantatg a l'urari. Sche quai vala per l'entir project n'è betg garantì. Previs èsi actualmain che l'entir cundriz saja a fin il 2027, uschia che tut las 3'000 maisas cun ils moduls solars produceschan e furneschan energia solara en l'entira Svizra.
Producziun d'energia solara crescha cuntinuadamain
Ma betg be en il Grischun vegn producida e duvrada energia solara. La producziun d'energia solara crescha constantamain ils ultims 15 onns. Ils davos trais onns è la creschientscha perfin anc s'augmentada.
