Dapi trais onn è la guerra la trista realitad en l’Ucraina. Glindesdi saira han persunas sa ramassadas per in cortegi atras la citad Cuira – da la plazza da la staziun enfin la grotta sper la Plessur. 80 persunas han prendì part, laschà ir musica ucranaisa, han clamà a la forza da l’Ucraina, chantà, cridà e stadas là ina per l’autra. Cun intginas persunas ha Radio RTR discurrì ed ils pleds ch’eran adina puspè d’udir èn speranza e curaschi.
Ina da las 80 persunas tar il cortegi, ch'ha tranter auter chantà cun ina gruppa da dunnas, è Olena Dvorytska. Ella è qua en Svizra cun sia figlia ed ils biadis. Ses figl è anc adina a Kiew e quai fetschia quitads ad ella.
Natiralmain essan nus tuts stanchels. Tuttina avain nus curaschi e forza – nus n'avain nagin’autra pussaivladad.
Exposiziun da fotografias
Sper il cortegi datti era ina exposiziun cun fotografias da la guerra. Quellas èn da vesair en la gallaria da la citad cul num «Ukraninisches Fototagebuch». Tut las fotografias mussadas derivan da fotografs da l'Ucraina che mettan a disposiziun gratuitamain lur ovras.
Olga Brovko è ina da las numerusas persunas che contemplescha ellas. Ella è da Kiew e stat dapi trais onns en Grischun. La giuvna di ch’ella haja anc adina speranza. Autras persunas, era sia mamma, bab e frar hajan pers ella.
Jau poss m'imaginar uschè bleras nauschas variantas. Jau na less dentant betg pensar vi da quai. Jau sper ch'i vegn bun per nus.
Sin las fotografias na vesan ins nagin sang. Dentant mussan ils purtrets da las citads destruidas, da las fatschas dals uffants e dals schuldads avunda bain tge miseria che la guerra porta.
Impressiuns ord la galaria
-
Bild 1 von 4. L'exposiziun da purtrets en la gallaria da la citad. I n'è betg da vesair sang – la miseria è dentant era da vesair en las fatschas da las persunas purtretadas. (Fotografias da «Ukrainisches Fototagebuch»). Bildquelle: Diari da fotografias ucranais.
-
Bild 2 von 4. Purtrets or dal mintgadi da la guerra che dura schon trais onns. (Fotografias da «Ukrainisches Fototagebuch»). Bildquelle: diari da fotografias ucranais.
-
Bild 3 von 4. Las citads en l'Ucraina che paran da traglischar sut il sulegl. In sguard pli precis revelescha la destrucziun. (Fotografias da «Ukrainisches Fototagebuch»). Bildquelle: diari da fotografias ucranais.
-
Bild 4 von 4. Il cumià è omnipreschent en l'Ucraina. (Fotografias da «Ukrainisches Fototagebuch»). Bildquelle: diari da fotografias ucranais.
Fertant ch'ils ins contempleschan las fotografias, va il cortegi vinavant atras la citad veglia. Intginas persunas han larmas en ils egls, sa tegnan als mauns e blers tegnan il telefonin ad aut per filmar la massa da persunas. Mintgin e mintgina en quest cortegi ha in'atgna istorgia da raquintar. In dad els è Mykola, in giuven da Mariupol ch'è dapi trais onns en Svizra.
Jau era dus mais en la bloccada da Mariupol durant ils bumbardaments ed hai pers là mia famiglia. Sco po quai anc adina esser? Jau ma sent terribel.
Da vesair che diversas persunas, era Svizras e Svizzers, vegnan ensemen per mussar solidaritad fatscha bain. I saja dentant era curius da viver tut normal en Svizra ed en il medem mument savair tge che capita en l'Ucraina, en patria.