Son Niclà ier ed oz
La tema da Son Niclà, ina tema che blers han en lur uffanza. Er ina tema ch'Elsa Caviezel, ch'abitescha dapi 23 onns a Vrin, aveva, cura ch’ella era ina giuvna. Ella è creschida si a Trun.
Jau hai gì ina starmenta tema ils emprims onns. Atgnamain na ston ins betg avair tema dad el. Son Niclà è in bun um.
Tar ella è quai sa midà. Tema n'haja ella betg pli, dentant quai pir dapi che ses agens uffants han prendì part a la tradiziun. Il Son Niclà a Vrin saja era tut auter che quel ch'ella haja en memoria da Trun. Tenor ella saja quel da Vrin pli flot. Adina n'era quai dentant betg uschia. Er a Vrin era il Son Niclà pli baud in nausch, sco Anton Alig lascha sentir.
Son Niclà è ussa pli pulit che quai ch’el era ina giada. Avant massa onns era el in detg nausch. Nus temevan fitg el.
Las mandarinas e nuschs derscheva el a mez stiva giun plaun. Ina memoria ch'è restada a l'indigen. El saja led ch’il San Niclà saja sa midà. Uschia sco el è ussa, saja endretg. Era Pieder Alig ha sumegliantas regurdientschas da pli baud. La torta vegnivi da quest temp ea en acziun intginas giadas.
En l'ustaria da la Posta amez il vitg han ils giasts laschà reviver inqual regurdientscha da lur uffanza. Er els san anc da las tortas. Ils asens faschevan starment sco els han ditg. Sch'ins guarda sin tut, datti bler ch'è sa midà ed il Son Niclà e ses gidanters èn daventads pli ruassaivels.
Son Niclà cun la vusch auta
A Vrin hai dà ina premiera quest onn. Per l'emprima giada ha ina dunna surpiglià la rolla e montà la barba alva. Betg in dals giuvens haja vulì far, uschia ch'ins haja stuì chattar ina schliaziun, di Jasmin Gabriel, la Son Niclà, da quest onn. Patratgs pervi da la vusch auta n'ha ella dentant betg stuì far. A Vrin datti numnadamain ina speziala tradiziun. Il Son Niclà discurra cun ina vusch auta, n'emporta betg sch'in um u dunna porta il chapitsch cotschen.
Cura vegn Son Niclà exact?
In'autra chaussa che fatschenta adina puspè quels che fan Son Niclà è la data. Cura far la saira da Son Niclà? La fin d'emna avant ils 6 da december u pir quella suenter? Durant l’emna na saja gnanc pussaivel da far. Memia blers manchian lura. Quai era ina giada auter sco Albert Caviezel, in indigen da Vrin, di. Els gievan adina la saira da Son Niclà era sch'i era durant l’emna.
Vrin ha Son Niclà visità la sonda passada. En auters vitgs vegn el pir l'autra fin d'emna en las stivas ed ustarias. E tgi sa, sch'el è era là pli pulit che pli baud.
