Blers pretendan che Son Valentin saja in'invenziun dals flurists per far ina buna fatschenta. Sche quai fiss la vardad giess lur plan en mintga cas si. Suenter il di da la mamma è il Son Valentin il segund ferm di da vendita per fluristas e flurists.
Uschia era tar il flurist engiadinais Patrick Müller. Per ch'el e sia butia da flurs a Cuira èn pronts per tut ils clients e clientas che vegnan a cumprar flurs per lur marus e marusas pretendi bleras investiziuns e preparaziuns. Uschia vegnan ils furniturs aposta per il Son Valentin cun lur camiuns plain flurs. Ma era tar ses auters furniturs cumpra Patrick Müller in bun tant dapli flurs che normalmain. Mo per il Son Valentin investescha el plirs millis francs. Quai natiralamain senza garanzia che tut questas flurs vegnan la fin finala era cumpradas. Ma sia devisa è: Quai ch'el n'haja betg en butia, na possia el era betg vender.
Era sch'el vendia betg mo rosas cotschnas da Son Valentin, saja quai anc adina la flur che vegn cumprada il pli savens durant quest di. Uschia haja el normalmain enturn 30-40 rosas en sia butia. Durant Son Valentin vendia el enturn 500 da questas rosas.
Enfin ussa haja tut questa lavur supplementara adina rendì, era grazia a la blera glieud che vegn grazia al Son Valentin forsa l'emprima giada en butia e daventa suenter in client u ina clienta regulara.