Sonda, ils 25 da matg envidan la «Südostschweiz» e Radiotelevisiun Svizra Rumantscha (RTR) ad ina occurrenza electorala al martgà da l'emna a Cuira. Vi d'in stan sin il Kornplatz tutgan las redacziuns da las duas chasas da medias il viv a las candidatas ed als candidats da las elecziuns dal cussegl da la citad da Cuira. Quai da las 09:00 fin las 10:30.
Patrik Degiacomi (fin qua, PS), Simon Gredig (nov, Glista libra/Verda), Hanspeter Hunger (nov, PPS), Sandra Maissen (fin qua, AdC), Hans Martin Meuli (nov, PLD) e Johannes Meyer (nov, verd-liberals) s'occupan da las dumondas da moderaturas e moderaturs da tuttas duas chasas da medias. Plinavant vegnan ils sis concurrents a schliar in'incumbensa speziala al martgà da l'emna. Las intervistas e tge figura che la candidata ed ils candidats han fatg tar lur incumbensas, mussan RTR e la Südostschweiz ils dis suandants sin differents chanals.
Cun la fin da l'onn va a fin a Cuira la perioda d'uffizi da quatter onns per las commembras e per ils commembers dal cussegl da la citad e dal cussegl communal. Urs Marti (PLD) sorta da l'executiva suenter 12 onns sco president da la citad pervi da la limitaziun da temp d'uffizi. Ils 9 da zercladur vegnan ils trais commembers per la perioda d'uffizi 2025 fin 2028 elegids. In eventual segund scrutini ha lieu ils 30 da zercladur.