Sonda lunga a Cuira - Cultura per tscharvè, cor ed olma

Durant las 15 uras da la sonda lunga 2022 han 4'200 persunas visità las differentas chasas cun program cultural. En tut èn quai stadas 18'600 entradas, pia ha mintga persuna visità pli che quatter preschentaziuns. La manadra dal project Anita Willi, è fitg cuntenta cun la 15avla ediziun da la sonda lunga. I saja stà l’emprima giada suenter la pandemia ed uschia na haja ella e ses team betg spetgà in record da visitaders e visitadras. L'onn 2019 ha ella quintà varga 5'000 persunas.

Fotografias analogas

En il plaun sutterran dal center Steinbock a Cuira ha la societad Grain Circle sia stanza. Ils 40 commembers e commembras han exponì fotografias analogas sin paraids da betun. En ina stanza per sviluppar las fotografias ha Silvan Lampert mussà il process da la fotografia sin la camera analoga enfin la fotografia sin il palpiri.

Show da scienza

En il museum da natira dal Grischun ha il professer Christian Kropf preschentà en maniera divertenta, co animals ed insects s’aman e co els èn schiglius. Cun exempels tut absurds ha el fatg rir las circa 170 visitadras e visitaders.

Concert da scolas da talents

Las scolas da talents Cuira, Tavau e Surselva han preschentà cun la band Kanti-s-Wings da Cuira in program vast. Cun chant, battaria, trumbetta, clavazin e ghitarra han ils giuvenils e giuvenilas chantà e sunà chanzuns internaziunalas da Michael Jackson, ma er chanzuns rumantschas sco «A l'ester».

Davos las culissas da RTR

Er en chasa da medias da RTR han visitadras e visitaders er pudì dar in'egliada en las differentas professiuns. Uschia guardar co ch'i vegn fatg radio, televisiun u er cuntegn online. Plinavant han uffants zambregià radios ed i ha dà musica rumantscha sco accumpagnament.