La 18avla ediziun da la Sonda lunga ha puspè carmalà millis da persunas en la chapitala grischuna. Passa 5000 persunas hajan visità las differentas instituziuns cun program cultural a Cuira, communitgeschan ils organisaturs. Per l'emprima giada è cun il Museum dal Viaduct a Langwies sa participada in'instituziun ordaifer il radius da la citad da Cuira. Quai è stà ina da set premieras - cun set novas chasas culturalas ch'èn stadas da la partida quest onn.
Program vast sco mai – visitas uschè vastas sco anc mai
En tut han las 28 chasas dumbrà bunamain 22’000 entradas singulas en salas da concert, museums, teaters, galarias ed uschènumnads «off-spaces». Quest dumber da chasas ch'han avert lur portas als visitaders e las visitadras è stà il pli aut en l'istorgia da la Sonda lunga. Quella aveva cumenzà l'onn 2007 cun 13 chasas. Ils passa 100 differents programs ch'ellas han arranschà èn resultads en pli che 250 occurenzas durant 15 uras (da mezdi enfin las 03:00).
Impressiuns da la Sonda lunga 2025
-
Bild 1 von 12. Museum d'art dal Grischun. Bildquelle: Yanik Bürkli.
-
Bild 2 von 12. Museum d'art dal Grischun. Bildquelle: Yanik Bürkli.
-
Bild 3 von 12. Werkstatt. Bildquelle: Yanik Bürkli.
-
Bild 4 von 12. CUADRO22. Bildquelle: Yanik Bürkli.
-
Bild 5 von 12. Sinnhof. Bildquelle: Yanik Bürkli.
-
Bild 6 von 12. Baselgia da S. Martin. Bildquelle: Yanik Bürkli.
-
Bild 7 von 12. Tango Cuira. Bildquelle: Yanik Bürkli.
-
Bild 8 von 12. WWF Grischun. Bildquelle: Yanik Bürkli.
-
Bild 9 von 12. Postremise. Bildquelle: Yanik Bürkli.
-
Bild 10 von 12. Street Art Festival Cuira. Bildquelle: Damian Caduff.
-
Bild 11 von 12. Südostschweiz. Bildquelle: Daniel Ammann.
-
Bild 12 von 12. Museum dal Viaduct a Langwies. Bildquelle: Nina Homberg.
In tal program pretenda lavur da preparaziun era da las visitadras ed ils visitaders. Per ils blers è quai absolutamain nagin problem - per auters è il program talmain vast magari era in zic in factur stressant. Quai è chapibel per la manadra da project da la Sonda lunga Anita Willi. L'avantatg dad in program extendì saja da l'autra vart che la massa da glieud sa repartia meglier, uschia ch'i na dettia betg pli savens lieus, nua ch'ins na possia betg pli entrar causa memia blera glieud.
Prolungaziun da la Sonda lunga betg anc realistic
Tscherta glieud haja era in zic gugent quel «stress» durant 1 di e vesan quai sco in di per dar gas total. Che autra glieud giavischass dentant in pau dapli temp per quest vast program ed avess plaschair vid in'entira «Fin d'emna lunga» saja bain ina bell'idea. Bleras pitschnas chasas che avran lur portas durant quest lung di vegnian dentant gia ussa a lur cunfins cun il persunal. Perquai saja ina prolungaziun da la Sonda lunga actualmain pauc realistic.
La proxima ediziun da la Sonda lunga a Cuira vegn ad esser ils 14 da november 2026.