Per ina sonda èsi stà ruassaivel l'ultima sonda en il «Welschdörfli» a Cuira. I n'è betg uschia che la via da party è stada morta ora, dentant han ins percorscha che l'obligatori da mascra ha in'influenza sin la glieud.
Chapientscha u nagina chapientscha
Sco usità han ils clubs avert lur portas per beneventar la giuventetgna. Ed ils clubs n'èn betg restads vids. Ma il dumber da glieud è stà pli pitschen che durant ina sonda normala a Cuira.
Quels ch'èn tuttina vegnids èn il «Welschdörfli» durant la notg, n'han betg sa laschà starmentar dal coronavirus. Las opiniuns davart las prescripziuns severas èn dentant stadas fitg differentas tar la giuventetgna.
Jau fatsch quai ch'il chantun prescriva. Mai na disturba la mascra betg.
Las prescripziuns èn uschè exageradas. Sche quai va vinavant uschia na datti bainbaud betg pli questa entira scena da party.
Er la glieud che na chapescha betg las mesiras severas, han dentant prendì la mascra per ir en sortida. «Sch'igl è da metter si mascra, mettain nus si ella». Il plaschair da far party n'han las persunas ch'èn stadas la sonda en sortida a Cuira betg vulì sa laschar prender.