«Jau sun responsabla per la crew e per ils umans che nus salvain. Mes patratgs èn adina tar els», raquinta Laura Crameri. La Puschlavina ch'ha 30 onns è turnada avant paucs dis da sia ultima missiun da tschintg emnas en la Mar mediterrana.
L'emprim è ella stada là sco voluntaria, dapi il november passà è ella manadra da la tgira sin la nav-mamma da l'organisaziun tudestga «SOS Humanity» ed è daventada in profi. Suenter ir en il port a Siracusa è ella turnada in pèr dis en las muntognas da sias ragischs, «in mument impurtant da reflexiun per far liber ils sentiments ch'eran anc serrads en l'intern», manegia ella. Suenter turna ella a Londra nua ch'ella abitescha.
Cun «dialog» emprendais d'enconuscher novitads e debattas da nov. Discutai sur da temas relevants – n'emporta betg en tge lingua naziunala. Nus translatain per vus. Ina equipa da redacziun surregiunala selecziunescha mintg'emna in nov tema, per Vus da debattar. Plinavant datti interessants artitgels or da tut las parts da la Svizra. Ed in tool ch'è vegnì fatg sin basa da la retschertga «Co vai, Svizra?» mussa, nua che Vus essas tar in tema, cumpareglià cun ils auters.
Dapi onns activa en il champ social ha Laura fatg experientschas en Frantscha, India e Nepal ed er en projects cun fugitivs sirians e libanais. Tranter differentas culturas sa mova ella en sis idioms, chapescha er arab, ma en sia lavur actuala sin la mar è il talian decisiv mintga giada ch'ins arriva en il port.
Sin il bastiment «ston ins s'adattar, tut è caotic», elavurar cun pauc per metter en salv ils migrants ch'emprovan da cuntanscher la riva europeica. Quasi 200 persunas èsi stà, per il pli minorennas, tar l'ultima rotaziun. Per in novnaschì è l'agid vegnì memia tard.
Tragedias umanas cun las qualas ella vegn confruntada en ina lavur che «decida sur da vita e mort» sut cundiziuns disfavuraivlas. Betg mo pervi dals paucs meds, cun ils quals ils gidanters ston s'arranschar: «Nus vesain ch'il clima en la politica è encunter nus, cunter ils dretgs umans e cunter in'Europa umana», di Laura Crameri. «Mes giavisch è adina puspè che nossa lavur na saja betg pli necessaria, pertge quai ch'jau fatsch duess esser in project solidaric che vegn coordinà dals pajais europeics.»