Melanie Di Stasio e Katharina Egger èn dapi onns tgirunzas diplomadas cun corp ed olma. E perquai han ellas era gì il curaschi da dar lur fatschas per la nova campagna da la Spitex e las chasas da tgira dal Grischun. Ellas èn duas da trais persunas ch'èn vegnidas purtretadas cun ina fatscha rienta, ina posa segira ed in lismer turchis.
-
Bild 1 von 2. Melanie Di Stasio . Bildquelle: Monika Schnoz.
-
Bild 2 von 2. Katharina Egger. Bildquelle: Monika Schnoz.
Creà la campagna ha Monika Schnoz da Cuira, cussegliadra da communicaziun e part da la Federaziun grischuna d’ospitals e da las chasas da tgira. Ella ha era gia creà ils davos placats per far attent sin il mastergn da la tgira – l’emprima giada avant tschintg onns.
Placats funcziuneschan perquai ch'ins na po betg guardar davent. I n'è betg uschia ch'ins stat mintga giada airi e studegia els ma ins fa stim.
La finamira è da far attent sin la professiun da la tgira e da far frunt a la mancanza da persunal qualifitgà. Melanie Di Stasio lavura dapi nov onns tar la Spitex dal Plaun ed accentuescha che lur lavur saja pli varianta che quai che blers e bleras pensian:
Perquai ch'ils pazients e las pazientas na stattan betg pli usche ditg en l’ospital pudain nus far dapli lavurs medicinalas. Igl è fitg vast e variant.
Sin il placat da la tgirunza diplomada Katharina Egger che lavura en la Chasa da tgira Serata a Zezras stat scrit en colur blaua «tes comeback» – insatge che stat era persunalmain a cor a la dunna da 58 onns. Ella haja numnadamain stuì far ina pausa da lavur cura ch'ella haja survegnì ses uffants perquai ch'ella n'avevan nagin che pudeva sa gidar dad avair quità da quels.
Ed era la manadra da la campagna Monika Schnoz haja adina puspè fascinà d'udir co collavuraturas e collavuratur da la tgira sajan intgantads da lur mastergn. Era perquai haja ella quella giada vulì purtretar «vairas» persunas sin ils placats. Malgrà ch'i saja grev dad eruir l'effect concret dad uschia ina campagna sin la mancanza da persunal en la branscha, è Monika Schnoz segira ch'i saja tuttina impurtant da render visibla la professiun – en quest cas sin gronds placats e quai en l'entir chantun Grischun.