Siglir tar il cuntegn

Header

cuntegn

Sport d'enviern Avrir ils territoris da skis pli baud u betg?

Suenter che la stagiun d'enviern passada è stada plitost magra en puncto naiv, han ils territoris da skis mumentan in motiv da sa legrar. Pervi da la blera naiv da l'emna passada, èn intgins territoris da skis sa decidids d'avrir lur portas gia pli baud che planisà per lur giasts.

Il territori da skis Brambrüesch ha gia cumenzà la dumengia passada cun ses manaschi, pia bun in'emna avant il termin ch'era atgnamain previs. Tenor Patrick Arnet, il manader da las pendicularas da Brambrüesch, saja quest'acziun era in engraziament per lur visitaders che hajan tegnì la fidaivladad al territori da skis era cun la pauca naiv l'enviern passà.

Nus avain vulì porscher a noss giasts uschè baud sco pussaivel in divertiment cun skis.
Autur: Patrick Arnet Manader da las pendicularas Cuira-Brambrüesch

Era il territori da skis Sursaissa-Mundaun vegn ad avrir sias pistas gia venderdi proxim, in'emna pli baud che planisà. L'avertura pli baud saja stada in pau cumplitgada cun la planisaziun da persunal, raquinta Ernst Sax, il president. Entant saja tut reglà ed il manaschi è pront per il cumenzament da la stagiun.

Spezialmain svelt ha il territori da skis La Péra a Trun reagì sin la midada da l'aura, tenor «La Quotidiana» è il territori sa decidì pir sonda passada da preparar sia pista pli baud – e quai han els lura gia realisà sin il proxim di.

Il territori da skis da Breil avra parzialmain la fin d'emna dals 9 e 10 da december. Quai è stà ina decisiun a curta vista, sco il directur da las pendicularas, Beat Zenklusen, ha ditg envers RTR. Oriund eri planisà d'avrir pir ils 16 da december. Quai surtut pervi d'intginas restructuraziuns, furmaziuns da persunal ed era ils hotels dal vitg ch'èn anc serrads.

RTR actualitad 17:00

Artitgels legids il pli savens