Siglir tar il cuntegn

Grischun Stad 2018: Chamonas dal CAS fan bilantscha

Da lunsch e damanaivel ein blers ids, grazia a la chalira, sin las chamonas dal Club alpin svizzer en il Grischun. En la Engiadina e la Bregaglia n'èn betg pli tants stà sin las chamonas l'avust. Dentant èn ins era là per gronda part cuntent cun la stagiun.

Chamona dal Terri cun la muntogna davos.
Legenda: La bell'aura ha carmalà inqual dapli che l'onn passà sin la chamona dal Terri sin il Plaun dalla Greina. MAD

Las chamonas en il chantun Grischun guardan, grazia a l'aura, enavos sin ina buna stad. Cunzunt en Surselva ed en la regiun da Cuira èsi quasi l'entira stad stà bell'aura e quai ha procurà per bler clientella. Quai han confermà las chamonas CAS da Maighels, Terri e Calanda.

Sin la chamona da CAS sin il Calanda hajan ins er nudà dapli giasts dal di en cumparegliaziun cun il davos onn. Quai sajan cunzunt stads indigens. Giasts sur notg èn dentant stads plitost da la Bassa.

avust pli magher en Engiadina e Bregaglia

Tar la chamona da Linard en l'Engiadina Bassa na possian ins betg discurrer dad ina meglra stad en cumparegliaziun cun auters onns. Il fanadur hajan ins tendenzialmain gì pli blers giasts ch'ils onns passads. L'avust n'è dentant betg pli stà uschè bun. Era en l'Engiadin'Ota sin la Chamona Jenatsch pon ins betg discurrer d'ina stad extraordinaria: Il fanadur è stà meglier, l'avust mender che l'onn passà.

Quai vala è per la Bregaglia: I haja pluvì l'avust dapli ch'en autras regiuns e quai ha tegnì davent cunzunt raividers sin la chamona da l'Albigna durant quai temps. Ed è il Piz Cengalo saja anc en il chau als viandants. Ins saja en general dentant era en la Bregaglia cuntent cun la stad 2018.

RR actualitad 07:00