Il temp da vacanzas en favrer è ina sfida per la retica. Quai mussa la visita tar la staziun da Cuira. Renato Gadient lavura dapi 40 onns tar la Retica. Actualmain è el responsabel per l’andament dals trens a la staziun da Cuira. Normalmain lavura el bler en biro. Là coordinescha el la lavur dal manevraders. Durant la stagiun ota è el però er engaschà a la front.
Trens plains en Favrer
Il favrer è in dals mais ils pli ferm frequentads tar la Retica. La fin d’emna passada hajan ins transportà 15’000 persunas, din ils responsabels sin dumonda dad RTR. Ma quai n’è anc in record. Durant il maraton da passlung transporta la Retica en buns onns fin 35’000 persunas.
Igl è ina sfida da chanalisar 200 fin 300 persunas che partan dal medem binari pli u main il medem mument
Uschè blera glieud n’ha Renato Gadient chanalisà en mardi a bun’ura a Cuira. Ma il travasch sin il binari dus è tuttina stà grond. Sin quest binari sa radunan ils giasts che van ad Arosa. Quest’emna vegnan duvrads trens spezials – tranter auter per transportar scolars e scolaras da Rorschach, che fan in’emna da skis si Arosa.
Malgrà las sfida va questa bunura tut bain, il tren regular – ed in per minutas pli tar il tren spezial, partan punctualmain davent da Cuira.