Stagiun da grippa - L'unda da grippa n'è anc betg qua
I para bunamain sco sche la mesadad dals umans en il Grischun fuss malsauna, cun in nas che cula u schizunt cun ina grippa – in sentiment tut normal durant l'atun. Quai saja mintg'onn uschia e saja dal tuttafatg normal. Tenor la media chantunala Marina Jamnicki n'è l'unda anc betg arrivada tar nus.
En il Grischun n'è la situaziun dals cas da grippa ma era dals cas da Covid insumma betg alarmanta ni extraordinaria. Tenor Marina Jamnicki creschan las cifras minimamain. Quai però en il rom dals ultims onns.
L'unda da grippa na è anc betg qua. Ma ella vegn, sco mintg'onn.
Quant ferma che l'unda da grippa daventa ni era quant grev che l'andament vegn ad esser, na sa ins actualmain dir. Quai ch'è era quest onn, sco era gia ils ultims onns: sco emprim vegn l'unda da corona – quella adina durant l'atun. L'unda da la grippa vegn per il solit pli tard, durant ils dis da festa en il december. Ina prognosa positiva en quai che reguarda corona saja però pussaivla. La varianta actuala na para betg d'esser ina cun in andament grev. Ma per sa proteger cunter corona ni era la grippa valan er quest onn las reglas d'igiena. Lavar ils mauns, tegnair distanza, starnidar en la foppa dal cundun.
5 tips co restar sauns
Avrir la boxSerrar la box
Tegnair il bratsch avant bucca sch'ins sto tusser e lavar regularmain ils mauns.
Sa mover avunda durant il di, idealmain almain mes'ura en l'aria frestga.
Sa nutrir sanadaivel e da modavariada: cunzunt verduras (p.ex. peperoni, broccoli u spinat) e fretgs (p.ex. da citrus u kiwis) sustegnan il sistem d'immunitad. Baiver almain 1,5 liters d'aua u tee (p.ex. chaminella, salvgia u curcuma).
Durmir avunda, per ch'il corp po sa revegnir da stress: 7 fin 8 uras èn ideal per in creschì, 8 fin 10 per giuvenils e 9 fin 13 per uffants sut 12 onns.
