Ch'i saja si'ultima stagiun sco directur, haja forsa gì in'influenza marginala tar la planisaziun dal program 2023/2024, di Roman Weishaupt. Els hajan decidì da far il program exact tuttina sco sch'i cuntinuass. Il public possia pia quintar cun in program da la medema qualitad – quai saja gea er lur incumbensa.
Sa fermar e laschar liber
Durant la creaziun dal program sajan dentant nunconscientamain sa cristallisadas ora differentas ideas generalas che giajan bain ensemen cun il cumià: sa fermar, prender curaschi, midar la perspectiva e laschar liber.
Jau m'allegrel sin tut quai che vegn, sin tut las s'entupadas cun il public.
Sentiments ubain patratgs da cumià n'haja el anc nagins. El supponia che forsa l'onn proxim, durant la stagiun, possia dentant vegnir ina tscherta encreschadetgna u in tschert star mal ch'i saja lura prest finì.
Dumondas avertas
Tuts sajan gia uss plain marveglias tge ch'el fetschia suenter. Deplorablamain stoppia Roman Weishaupt trumpar tuts, perquai che anc tut saja avert. Ideas sajan dentant denturn.
Jau sun spanegià tge pussevladads e pussaivladads ischs che s'avran da nov. Jau m'allegr!
Quai che pertutga il post da directur u directura: Il cussegl da fundaziun è actualmain sin la tschertga dad in successur u ina successura. Actualmain hajan lieu discurs cun persunas pussaivlas. Tenor Ramun Bernetta dal cussegl da fundaziun, vegnian ins a communitgar en il decurs dal proxim mais, tgi che surprendia proxima stad la batgetta dal Teater Cuira.
Il program
La stagiun cumenza il settember cun ina coproducziun che sa numna: «Kilroy ist not here anymore». Quai saja in'opera senza opera sin basa dal cudesch da l'autur svizzer Jürg Federspiel – in dals highlights persunals per il directur Roman Weishaupt.
In terz dal program èn purschidas per uffants e giuvenils, uschia per exempel il project spezial « Teater en stanza da scola». Enstagl che las classas vegnan a Cuira a teater va il teater en las scolas. Cun sustegn dad artists ed artistas da tuttas trais linguas dal Grischun elavureschan las classas in toc da teater tar il tema «gistadad». Era sch'igl na dettia deplorablamain betg pli ils «Digi-Days» ch'il teater haja pudì realisar sin basa dal project da transfurmaziun dal chantun pervia da la pandemia giaja il teater digital vinavant en tschertas producziuns.