Dals en tut 4'092 malfatgs cunter il Cudesch penal èn 40,0 % delicts d'enguladitsch, 15,5 % delicts d'enguladitsch da vehichels e 14,6 % pertutgan donns materials. Ils 14,8 % restants sa repartan sin engion, extorsiun, delicts da concurs e da scussiun, rapina ed enguladitschs cun strair or da maun, uschia commintgescha la Polizia chantunala dal Grischun.
Pli paucs cas da violenza
En tut la la Polizia chantunala registà 543 delicts da violenza, quai èn 20 % pli pauc che l'onn 2020. En spezial è sa reducida la part da violenza greva da 30 sin 26 delicts. La gronda part dals delicts da violenza èn smanatschas, acts da violenza, blessuras corporalas simplas, violenza e smanatschas cunter autoritads sco er constricziuns. Er ils cas da violenza a chasa èn sa reducids, quai da 254 sin 217 cas.
Cugliunaria sa sposta en l'internet
L'Uffizi federal da statistica ha eruì per l'onn 2020 per l'emprima giada las cifras per il sectur da la criminalitad digitala. Quellas mussan ch'i ha dà ils ultims onns in spustament da cas da cugliunaria en l'internet . Tenor la statistica tutgan passa 70 % dals engions registrads en l'entira Svizra al sectur da la criminalitad digitala. La quota da scleriment è dentant mo tar stgars 40 %. Vitiers vegn il dumber zuppà stimà aut, da cas da cybercriminalitad che na vegnan betg denunziads. Per meglierar la quota da scleriment vul la Polizia chantunala dal Grischun sensibilisar la populaziun areguard malfatgs en la rait.