Siglir tar il cuntegn

Header

Navigaziun

cuntegn

Statistica requirents asil GR Pli paucs requirents – pli paucs centers d'asil

Dapi il 2015 è la cifra da novs requirents d'asil regressiva. Uschia ha il chantun pudì reducir il dumber dals centers d'asil en il Grischun. Tuttavia è tar ils blers requirents d'asil il pajais d'origin il medem sco avant in pèr onns.

Curt e concis:

  • Dapi il 2015 datti pli e pli paucs requirents en il GR – la situaziun d'asil resta dentant dinamica.
  • Pli paucs requirents d'asil mainan tar ina reducziun dals centers d'asil.
  • Ina prognosa co las cifras da requirents vesan ora ils proxims onns na pon ins betg far.
  • Ils blers requirents d'asil vegnan ord ils medems pajais sco ils ultims onns.

«Nus avain ina situaziun fitg dinamica»

statistica
Legenda: RTR Grafica

Sco ins vesa sin la grafica datti fitg grondas differentas da novas dumondas d'asil en il Grischun tranter ils onns. Quellas differenzas sa laschan dentant declerar simpel:

Ils onns 1998/1999 è il dumber stà aut pervi da la guerra en la Jugoslavia. L'aut dal 2012 sa lascha declerar tras la Primavaira araba ed il 2015 èsi vegnì tar l'ultima gronda unda da fugitivs.

Nus vain ina situaziun fitg dinamica en il sectur d'asil. Perquai ston ils sistems sin nivel naziunal, chantunal ma er communal esser capabels da s'adattar.
Autur: Marcel Sutermanader da l'uffizi per migraziun GR

Pli pauc lavur cun dar suttetg – pli bler cun integrar

Cunquai che l'occupaziun è pli bassa ch'ils onns avant èsi stà pussaivel da reducir il dumber da centers d'asil en il Grischun. Uschia è il center da Valchava e Tavau Plaz vegnì schlià l'onn passà ed il center Löwenberg a Schluein vegn schlià fin settember da quest onn.

Percunter ha il chantun bler da far quai che pertutga la lavur d'integraziun da fugitivs, explitgescha Marcel Suter: Ils requirents d'asil ch'èn vegnids en Grischun durant l'unda da fugitivs 2015/2016 han uss survegnì la decisiun da restar u betg e quellas persunas che dastgan restar, han uss il dretg da vegnir integradas.

Prognosa betg pussaivla

Co i vesa or en il futur cun annunzias d'asil è fitg grev da dir. Quai dependa cunzunt dals differents conflicts en ils pajais danunder che la persunas scappan. Sa meglierescha la situaziun al lieu u betg?

Plinavant dependia er co ils pajais en vischinanza da la Svizra sa cuntegnan en causa asil, pertge sche lezzas engrevgeschan la situaziun als requirents d'asil pudessi puspè esser ch'i vegn a dar dapli dumondas d'asil en Svizra.

Ils blers requirents ord la Tirchia e l'Eritrea

statistica con blers asilants vegnan da tge pajais
Legenda: RTR Grafica
Las requirentas ed ils requirents vegnan anc adina ord ils medems pajais sco avant in per onns en il Grischun.
Autur: Marcel Sutermanader da l'uffizi per migraziun GR

Sch'ins mira dentant sur l'entira Europa ora hai dà ina midada: Blers requirents d'asil vegnan danovamain or da l'America Centrala, cunzunt or dals pajais Venezuela e Honduras. En Svizra sentian ins era quest trend, per il mument èn dentant be 54 persunas s'annunziadas per in asil. Qua datti anc adina cleramain las pli bleras dumondas ord l'Africa (per exempel Eritrea, Siria, Somalia) e l'Asia (per exempel Irac, Iran, Sri Lanka).

RR actualitad 07:00

Legenda: Guardar il video Nua èn ils fugitivs?. Durada 02:37 minutas.
Or da Nouvo RTR dals 13.05.2019.