Ch'igl ha dà dapli activitad sin las vias suenter la pandemia, pon ins er observar vi da las multas da traffic. En Svizra sco er en il Grischun hai dà dapli:
- Pervia da cuntrafar a la lescha da traffic han 23 persunas survegnì in chasti da praschun cundiziunà (il 2021 èsi sta 28).
- In chasti da praschun nuncundiziunà han 11 survegnì (3 dapli che 2021).
- 2'039 persunas han survegnì ina multa cundiziunada, ina multa nuncundiziunada han 139 persunas survegnì.
La vasta maioritad èn stads umens. Il 2022 èn 1'828 umens vegnids sentenziads e 347 dunnas.
Bler dapli chastis pervia d'alcohol
En l'entira Svizra hai dà 6% dapli sentenzias pervi da delicts da traffic il 2022. Il dumber da sentenzias pervia da charrar cun alcohol è puspè s'augmentà per radund in quart, ed è puspè sin il nivel d'avant la pandemia. En lunga vista è la cifra en il Grischun perfin sa sminuida.
Las sentenzias pervi da grops surpassaments da las reglas da traffic, il pli savens spertadads exageradas, han prendì tiers en Svizra per 4%, cumpareglià cun l'onn avant. Las cifras èn vegnidas publitgadas da l'Uffizi federal da statistica.
Corrigendum: Emprim èsi stà scrit che 2'213 persunas hajan survegnì in chasti da praschun cundiziunà. Endretg èn 23 persunas. Nus ans perstgisain per il sbagl ed avain curregì el.