Il festival da plirs dis haja tenor il president dal comité d'organisaziun, Jan Munnikhuizen, carmalà enturn 30'000 fin 50'000 visitaders e visitadras. La bell'aura da la fin d'emna haja segiramain era contribuì a quest dumber da visitaders fitg allegraivel, manegia Jan Munnikhuizen.
Il Street Food Festival ha gì lieu quest onn per la 9avla giada. Suenter l'emprima ediziun da l'onn 2016 haja il festival be stuì vegnir annulà ina giada fin uss, numnadamain pervi da corona. Tenor Jan Munnikhuizen saja la dumonda da plazzas da staziunament per vendiders bler pli gronda ch'il spazi ch'els possian porscher a la Via da la staziun. Perquai mettia l'organisaziun cunzunt paisa sin ina purschida multifara ed attractiva cun differentas tratgas ed ina schelta che sa mida mintg'onn in zic.
Per il giubileum da 10 onns dal Street Food Festival – che vegn ad avair lieu l'onn proxim – veglian ils organisaturs porscher insatge tut spezial. Segir na saja fin uss anc nagut, ma las ideas actualas tanschian da tribunas da cuschinar, in program da musica fin ad ina fiera cun products regiunals. Cunquai pon tuttas buccas finas gia esser spanegiadas sin l'ediziun da l'auter onn.