Persunas dependentas passentan ina gronda part da lur temp en il spazi public. Tar temperaturas miaivlas na saja nagin problem da passentar ils dis u durmir sut tschiel avert. Ma las temperauras fraidas fetschian anc pli greva la situaziun per persunas dependentas, di il mainafatschenta da l'uniun Agid per surviver Grischun Carlo Schneiter.
La fradaglia è ina sfida supplementara per la sanadad e per il consum.
La finamira da las turas la notg saja da segirar che nagin na stettia sur notg en in lieu, nua ch'el pudessia murir dal fraid, far a mogna in letg en l'alloschi d'urgenza e guardar che las persunas hajan almain vestgadira chauda u in satg da durmir. Per cletg na dettia betg blers cas, nua che persunas stettian sur notg en lieus exponids al fraid. Ina part da la scena saja er da viadi la notg.
«Stadtpark» avert la notg
Gist quels ch'èn da viadi la notg han las davosas emnas adina puspè procurà per discussiuns. Perquai ch'il Stadtpark, nua che la scena sa concentrescha durant il di, era serrà davent da las 23:00, aveva la scena midà vi en il parc dal «Lindenquai» da tschella vart da la citad veglia. Ussa ha la citad da Cuira dentant decidì da laschar avert il Stadtpark era la notg. Da princip considerescha Carlo Schneiter quella decisiun sco gista, perquai ch'i saja impurtant ch'i na dettia betg ina scena sparpagliada en differents lieus. El saja conscient che quai saja ina sfida supplementara per ils vischins dal Stadtpark. Ord vista generala saja il mal dentant pli pitschen, sche las persunas dependentas sajan adina d'entupar al medem lieu.
