La vischnanca da Razén ha cun Marc Gauch in nov president communal. Cun 103 da 175 vuschs valaivla ha l'informaticher fatg la cursa cunter ses dus cuntracandidats Dieter Spitzer e Daniel Simon. Gauch cumenza ses uffizi da president il prim d'avrigl 2026 e remplazza lura Reto Loepfe che na candidescha betg pli suenter 10 onns en uffizi.
Grev da chattar candidats per il presidi
Oriundamain na devi l'avust nagin interess per il presidi, quai che ha intimà la vischnanca da render attent pli intensivamain a la posiziun cun flyers e discurs. Questa campagn n'ha però gì nagin success. Sco davosa mesira han ins augmentà il pensum da lavur per il post dal president communal da 60% sin 80%. Grazia a questa mesira hai la finala dà trais candidats per il presidi communal.
Jau sun fitg cuntent ch'igl è gartegià da chattar trais candidats usché divers per il presidi da Razén. Il mender fiss stà sch'i avess mo dà in candidat e la populaziun avess mo pudì dir Gea u Gea.
Reto Loepfe che ha lavurà durant ses temp d'uffizi cun in pensum parzial da 60% punctuescha ch'i saja impurtant da motivar ils novs candidats e las novas candidatas. El vesa sias experientschas sco impuls, dentant betg sco recept fix per il success dals successurs.
Loepfe cusseglia da sa fidar da l'atgna glieud e da spezialists enstagl d'empruvar dad esser il meglier en tut ils secturs.
Mez avust na devi anc naginas candidaturas
La vischnanca da Razén aveva cun tut las forzas empruvà da motivar las persunas da candidar per il presidi. Tut ils discurs èn dentant stads senza success. Er in inserat sin plattafurmas da plazzas da lavur n'ha betg gidà. Candidatas u candidats potenzials han adina puspè menziunà ch'il pensum da lavur da 60% saja memia bass. Perquai ha la vischnanca stuì reagir ed ir sur ils cudeschs.
Durant la radunanza communala è lura vegnì acceptà l'augment dal pensum sin 80% – ina decisiun che procura per custs supplementars da passa 37'000 francs. Quai munta ina sfida per la vischnanca ch'è gia finanzialmain en las stretgas.
En sasez n'avain nus betg quels raps.
Er autras vischnancas han fadia da chattar presidents
Sper Razén è era la vischnanca da Claustra a la tschertga d'in nov president u ina nova presidenta. Els han spustà l'elecziun sin in termin pli tard cun la speranza ch'i dettia anc annunzias da persunas interessadas.
Tenor l'Uffizi da vischnancas grischun na saja quai dentant betg alarmant che gist duas vischnancas han il medem mument problems d'occupar lur presidi. Simon Theus, il substitut dal directur da l'Uffizi da vischnancas grischun, declera ch'i saja normal che tschertas vischnancas dovran pli ditg da chattar in nov chau al timun.
Qua dettia dentant pliras opziuns co reagir sin quest problem – augmentar il pensum u la paja per l'uffizi sajan be dus exempels. Mintga vischnanca reglia quai sezza tenor meglier savair e pudair e tut tenor ils agens basegns.