Ils Dis da litteratura a Domat èn il «Solothurn» da Rumantschas e Rumantschs. Durant ina fin d'emna l'entschatta november s'inscuntra e sa baratta la scena litterara rumantscha. Novas ovras vegnan preschentadas ed er discutadas. La finamira è da sa vesair, barattar ideas u survegnir impuls. Igl è in'occurrenza ch'i dovria cleramain, sco differentas commembras e commembers han ditg:
Ina lingua sco il rumantsch senza Dis da litteratura fiss sco in uman che giess zop.
Ils Dis da litteratura èn impurtants pervi da tut ils inscunters ch'ins ha cun glieud che s'interessescha per la lingua e per la cultura.
Igl è la suletta plattafurma ch'auturas ed auturs survegnan en quella moda. Sch'i na dess betg pli ils Dis da litteratura, sche lura fiss quai ina catastrofa.
Anc na datti betg la catastrofa. Per l'ediziun 2024 è tut sin buna via. Per l'ediziun dals Dis da litteratura 2025 datti però anc intgins segs da dumonda. L'entir comité d'organisaziun ha demissiunà. I sa tracta d'ina gruppa independenta aifer l'Uniun per la litteratura rumantscha. Uschia va la responsabladad per il program, l'organisaziun e las finanzas da l'occurrenza en ils mauns da la suprastanza, quai prevesan er ils statuts. Charplina u conflicts n'haja betg dà en il comité, èsi stà d'udir a la radunanza generala da l'uniun.
L'opziun da betg pli far ils Dis da litteratura n'è de facto nagina opziun.
Chattar persunas che s'engaschan – per gronda part voluntarmain – saja fitg grev e fin uss betg reussì, uschia la presidenta da l'uniun Manuela Balett. Vitiers saja in fatg che l'occurrenza nodia en il preventiv per l'ediziun da quest onn in grond deficit, tradescha la presidenta. Uschia saja er da ponderar co porscher en l'avegnir ils Dis da litteratura. Da insumma betg pli far quels na saja però nagina opziun.
Nus da la suprastanza avain surpiglià l'incumbensa da metter en pe in festival ch'è forsa pli pitschen u auter ch'ils ultims onns.
Ideas da cooperaziuns
A chaschun da la radunanza generala ha la suprastanza vulì generar ideas co far vinavant. Ideas hai dà differentas. Per exempel da far il 2025 in'ediziun pli pitschna. Lura èsi vegnì discurrì da pussaivlas cooperaziuns u er da far l'occurrenza a Cuira – enstagl da sco usità a Domat. Enfin uss èn però be ideas sin maisa. E la suprastanza va bainspert – anc ina giada – a la tschertga da persunas che vulan s'engaschar ensemen cun ella – per l'ediziun dals Dis da litteratura 2025.
Suprastanza puspè cumpletta
Sper la demissiun da l'entir comité hai er dà duas demissiuns en la suprastanza da l'Uniun per la litteratura rumantscha. Cun in applaus ha la radunanza elegì Walter Roselli e Rico Valär che remplazzan Carin Caduff e Jessica Zuan. La presidenta Manuela Balett, la cassiera Flavia Hobi e la suprastanta Annatina Nay èn vegnidas reelegidas.
